Nukus shahrida Abu Rayhon Beruniy nomidagi xalqaro kimyo olimpiadasi boshlanadi
Nukus shahrida maktab o'quvchilari o'rtasida III xalqaro kimyo olimpiadasi o'tkaziladi. Unda 32 ta davlatdan yoshlar ishtirok etadi.
Joriy yilning 3-10-noyabr kunlari Qoraqalpog'iston Respublikasining Nukus shahri dunyoning 32 ta davlatidan keladigan yosh kimyogarlarni qabul qiladi. Bu gal uchinchi marotaba tashkil etilayotgan Abu Rayhon Beruniy nomidagi xalqaro kimyo olimpiadasi maktab o'quvchilarining kimyo fani bo'yicha nazariy bilimlari hamda amaliy ko'nikmalarini sinovdan o'tkazishga mo'ljallangan nufuzli bilimlar bellashuvidir.
Mazkur nufuzli musobaqa tarixi shuni ko'rsatadiki, 2023-yili Xiva shahrida o'tkazilgan ilk bellashuvda 15 ta davlatdan 130 nafardan ortiq o'quvchi qatnashgan edi. Shuningdek, o'tgan yili Toshkent shahrida tashkil etilgan II xalqaro olimpiadada 16 ta davlatdan 115 nafar yosh kimyogar o'zaro kuch sinashgan. Joriy yilda esa Nukus shahri 32 ta mamlakat vakillarini bir maydonda jamlaydi.
G'oliblar uchun taqdirlash tizimi
Ushbu xalqaro olimpiadada sovrinli o'rinlarni qo'lga kiritgan o'quvchilar va ularning ustozlari uchun bir martalik pul mukofotlari belgilangan:
- Oltin medal sohibiga 12 BHM (5 million 280 ming so'm), uning o'qituvchisiga esa 50 BHM (22 million so'm) miqdorida mukofot beriladi.
- Kumush medal sohibi 8 BHM (3 million 520 ming so'm), uning o'qituvchisi esa 35 BHM (15 million 400 ming so'm) bilan taqdirlanadi.
- Bronza medal sohibiga 6 BHM (2 million 640 ming so'm), uning o'qituvchisiga esa 30 BHM (13 million 200 ming so'm) miqdorida pul mukofoti ajratiladi.
Manba: UzA
