O'zbekistondagi tibbiyot oliygohlari hindistonlik talabalar uchun nima uchun jozibador?
O'zbekiston tibbiy ta'lim olishni istagan hindistonlik talabalar uchun asosiy markazlardan biriga aylanmoqda.
2026-yilgi o'quv yiliga qabul jarayonlari qizg'in davom etayotgan pallada, O'zbekiston chet elda tibbiy ta'lim olmoqni maqsad qilgan hindistonlik yoshlar uchun yetakchi yo'nalishlardan biriga jadal o'zgarib bormoqda. Ayni paytda mamlakatimiz tibbiyot oliy o'quv yurtlarida taxminan 16 000 nafar hindistonlik talaba tahsil olmoqda. Ta'limning hamyonbopligi, akademik standartlarning yaxshilanishi hamda huquqiy muvofiqlikning kuchayishi shular jumlasidandir.
Ta'lim yo'nalishidagi hamkorlik va talabalar uchun shart-sharoitlar
Ikki davlat mutasaddi idoralarining birgalikdagi sa'y-harakatlari bo'lajak talabalar va ota-onalarning ishonchini mustahkamlashga xizmat qilmoqda. Hindistonning Toshkentdagi elchixonasi Hindiston Milliy Tibbiyot Komissiyasi (NMC) tomonidan 2021-yilda qabul qilingan qoidalarga muvofiqlikni ta'minlash uchun O'zbekiston vazirliklari va tibbiyot universitetlari bilan yaqindan hamkorlik qilmoqda. Elchixona 2026-yil 1-aprelda e'lon qilingan ogohlantirish xati cheklov emas, balki tavsiyaviy xususiyatga ega ekanini tushuntirib, talabalar o'qishga kirishdan oldin xorijiy muassasalarning talablarga mosligini tekshirishi muhimligini ta'kidlagan.
O'zbekistonda hindistonlik talabalarni qabul qilayotgan yetakchi oliygohlar sirasiga Andijon davlat tibbiyot instituti, Buxoro davlat tibbiyot instituti, Samarqand davlat tibbiyot universiteti, Toshkent davlat tibbiyot universiteti va uning Termiz filiali, Toshkent farmatsevtika instituti, Urganch davlat tibbiyot instituti, Farg'ona jamoat salomatligi tibbiyot instituti hamda Qoraqalpog'iston tibbiyot instituti kiradi. Ushbu davlat universitetlari arzon kontrakt narxlari, ingliz tilidagi ta'lim dasturlarining kengayishi va klinik tayyorgarlik infratuzilmasi bilan jalb etmoqda.
Nima uchun aynan O'zbekiston tanlanmoqda?
Hindistonda tibbiyot yo'nalishidagi oliygoh o'rinlariga bo'lgan talab taklifdan ancha yuqori bo'lib, qabul jarayonini o'ta raqobatli qiladi. Milliy kirish imtihonida yuqori ball to'plaganlar ham ko'pincha davlat kollejlaridan joy ololmaydi. Shuningdek, Hindistonda o'qish narxining qimmatligi, xususiy muassasalarda yillik to'lovlar 10 lakh rupiydan (taxminan 12 000 AQSH dollari) oshib ketishi o'rta sinf oilalari uchun og'irlik qiladi.
Taqqoslash uchun, O'zbekistonda butun o'qish davri uchun tibbiy ta'limning umumiy qiymati odatda 15 lakhdan 20 lakh rupiygacha (taxminan 18 000 – 24 000 dollar) tashkil etadi. Bu esa moliyaviy jihatdan qulay muqobil variant hisoblanadi.
Akademik natijalar ham mamlakatimizning jozibadorligini oshirmoqda. 2025-yil dekabr oyida o'tkazilgan Xorijiy tibbiyot bitiruvchilari imtihoni (FMGE) ma'lumotlariga ko'ra, O'zbekistondagi oliygohlar bitiruvchilari taxminan 42 foizlik ko'rsatkich bilan imtihondan muvaffaqiyatli o'tgan bo'lib, bu xorijda ta'lim beradigan asosiy davlatlar orasida eng yuqori natijalardan biridir.
Manba: UzA
