O'zbekistonlik OTM rektorlari Tojikiston Xalqaro turizm va tadbirkorlik universiteti faoliyati bilan tanishdi
O'zbekiston oliy o'quv yurtlari rahbarlari Tojikistonda o'tkazilgan forum doirasida Xalqaro turizm va tadbirkorlik universitetida yaratilgan sharoitlarni ko'zdan kechirdi.
Tojikistonda bo'lib o'tgan ikki davlat oliy ta'lim muassasalari rektorlari III forumi doirasida O'zbekiston OTMlari rahbarlari Tojikiston Xalqaro turizm va tadbirkorlik universitetiga tashrif buyurdi va u yerda talabalar uchun yaratilgan sharoitlar bilan yaqindan tanishdi.
Tashrif davomida o'zbekistonlik mehmonlarga oliygohning infratuzilmaviy, ilmiy hamda ta'lim salohiyati batafsil tanishtirildi. Shuningdek, universitetda sun'iy intellekt, raqamli texnologiyalar, iqtisodiyot, tadbirkorlik va turizm yo'nalishlari bo'yicha yuqori malakali mutaxassislarni tayyorlash tajribasi haqida ma'lumot berildi.
Xalqaro hamkorlik va qo'shma loyihalar
Uchrashuvda oliygoh faoliyatida xalqaro aloqalarni rivojlantirish ustuvor vazifalardan biri ekani alohida qayd etildi. Xususan, mintaqadagi, jumladan O'zbekistondagi oliy ta'lim muassasalari bilan aloqalarni yanada chuqurlashtirish muhimligi ta'kidlandi.
Ta'kidlanishicha, mazkur hamkorlik jarayoni o'zaro tajriba almashish, qo'shma ilmiy loyihalarni hayotga tatbiq etish hamda zamonaviy mehnat bozori talablariga to'la javob beradigan raqobatbardosh kadrlar tayyorlash imkonini beradi.
Manba: UzA
