Pedagogika yo'nalishi talabalari uchun tashqi diagnostika imtihonlari joriy etiladi

Pedagogika sohasida kadrlar tayyorlash sifati hamda ta'lim jarayonining samaradorligini baholash maqsadida talabalarning bilimini tekshirish uchun maxsus tashqi diagnostika joriy etilmoqda. Yangi tartibga ko'ra, mazkur jarayon har o'quv yilida bir marotaba pedagogika yo'nalishlarida tahsil olayotgan 3-bosqich talabalari o'rtasida test sinovlari shaklida amalga oshiriladi.

Sinov tartibi va baholash mezoni

Test sinovlari jami 50 ta savoldan iborat bo'lib, ularni bajarish uchun talabalarga 45 daqiqa vaqt ajratiladi. Bunda har bir to'g'ri javob 2 balldan baholanadi va maksimal natija 100 ballni tashkil etadi. Tashqi diagnostika natijalarini shaffof tashkil etish maqsadida har yili sentabr oyida Maktabgacha va maktab ta'limi vazirining buyrug'i bilan kamida 5 nafar malakali mutaxassisdan iborat maxsus ishchi guruh tuziladi.

Talablarga javob berish mezonlari

Tashqi diagnostika yakunlariga ko'ra yo'nalishlar quyidagicha baholanadi:

• O'rtacha 56 ball va undan yuqori natija qayd etgan ta'lim yo'nalishlari “talablarga javob beradigan” deb topiladi.
• 56 balldan past ko'rsatkich qayd etgan yo'nalishlar esa “talablarga javob bermaydigan” deb baholanadi.

Shuning bilan birga, mazkur tashqi diagnostika natijalari talabalarning joriy o'zlashtirish ko'rsatkichlari hamda reyting ballariga ta'sir qilmasligi belgilangan. Ushbu yangi tizim kelgusida pedagog kadrlar tayyorlash sifati holatini chuqur tahlil qilish va uni yanada takomillashtirishga xizmat qiladi.