O'zbekistonda huquqni muhofaza qiluvchi organlar oliy ta'lim muassasalari konsorsiumi tashkil etildi

Jamoat xavfsizligi universitetida Huquqni muhofaza qiluvchi organlar oliy ta'lim muassasalari konsorsiumini tashkil etishga bag'ishlangan tantanali marosim bo'lib o'tdi. Ushbu tadbirda O'zbekiston Respublikasi Huquqni muhofaza qilish akademiyasi rahbariyati ham ishtirok etdi.

Tadbir doirasida Prezident Administratsiyasi, Oliy ta'lim, fan va innovatsiyalar vazirligi, xalqaro tashkilotlar vakillari qatnashdi. Shuningdek, yangi Konsorsiumga a'zo bo'lgan ta'lim muassasalari – Huquqni muhofaza qilish akademiyasi, Ichki ishlar vazirligi akademiyasi, Jamoat xavfsizligi universiteti, Bojxona qo'mitasining Bojxona instituti hamda Favqulodda vaziyatlar vazirligi akademiyasi rahbarlari, soha ekspertlari va mas'ul xodimlari jam bo'ldilar.

Konsorsiumning asosiy maqsadlari va 2030-yil strategiyasi

Mazkur tuzilmaning asosiy vazifasi huquqni muhofaza qiluvchi tuzilmalar uchun xalqaro standartlarga to'la javob beradigan, halol, vatanparvar va yuqori malakali mutaxassislarni tayyorlaydigan zamonaviy ta'lim tizimini yo'lga qo'yishdir. Tadbir davomida taqdim etilgan 2030-yil strategiyasida ushbu tizimni amaliyotga yo'naltirilgan, mintaqada yetakchi hamda xalqaro miqyosda e'tirof etilgan kadrlar tayyorlash markaziga aylantirish ustuvor vazifa sifatida belgilandi.

Muhokamalar chog'ida ta'lim va infratuzilmani rivojlantirish masalalariga, jumladan Yagona kompetensiyalar modeli (CCF)ni tatbiq etishga alohida e'tibor qaratildi. Shuningdek, a'zo ta'lim muassasalarining mavjud kutubxona, laboratoriya hamda simulyatsion poligonlaridan o'zaro foydalanish imkoniyatlarini yaratish ko'zda tutilgan.

Raqamli texnologiyalar va xalqaro hamkorlik

Ta'lim ekotizimiga sun'iy intellekt va raqamli transformatsiya yechimlarini integratsiya qilish bo'yicha aniq vazifalar belgilandi. Bu borada yagona LMS platformasi, elektron portfolio hamda VR va AR texnologiyalaridan keng foydalanish rejalashtirilgan.

Tadbir davomida quyidagi ixtisoslashtirilgan markazlar faoliyatini yo'lga qo'yish istiqbollari muhokama qilindi:

• Kiberkriminalistika
• Korrupsiyaga qarshi kurashish
• Crowd Management
• Raqamli tahlil yo'nalishlari

Shu bilan birga, INTERPOL, CEPOL va UNODC kabi nufuzli xalqaro tashkilotlar bilan qo'shma tadqiqotlar o'tkazish hamda qo'shma ta'lim dasturlarini hayotga tatbiq etish masalalari ko'rib chiqildi. Mazkur tashabbus huquqni muhofaza qiluvchi idoralar uchun kadrlar tayyorlash jarayonini sifat jihatidan yangi bosqichga ko'tarish, ta'lim muassasalarining xalqaro nufuzini yuksaltirish hamda sohadagi institutsional hamkorlikni yanada mustahkamlashga xizmat qiladi.