Pedagoglar farzandlari uchun kontrakt chegirmasini olish tartibi ma'lum qilindi

Adliya vazirligida 2026-yil 9-iyulda 3849-raqam bilan ro'yxatdan o'tkazilgan qo'shma qarorga asosan, pedagogik faoliyat bilan bog'liq lavozimlar ro'yxatiga kiritilgan xodimlarning farzandlariga to'lov-kontrakt summasidan 30 foizlik chegirma beriladi. Shuni alohida ta'kidlash joizki, ma'muriy-boshqaruv, texnik hamda xo'jalik xodimlari mazkur ro'yxatga kirmaydi.

Ariza berish va ko'rib chiqish tartibi

Talaba kontrakt.edu.uz axborot tizimi orqali to'lov-kontrakt shartnomasini olish uchun ariza yuboradi. Shundan so'ng uning pedagog farzandi ekani elektron tarzda tekshirilib, tasdiqlangach, 30 foizlik chegirma qo'llaniladi. Taqdim etilgan arizalar ikki ish kuni ichida ko'rib chiqiladi. Mazkur chegirma bir o'quv yili davomida bir marta qo'llanishi belgilangan. Hozirgi vaqtda kontrakt.edu.uz tizimida ota-onaning pedagogik faoliyatini avtomatik aniqlash uchun vazirlik va idoralarning ma'lumotlar bazalarini integratsiya qilish ishlari olib borilmoqda. Shu sababli ariza topshirish imkoniyati ishga tushirilgani haqida qo'shimcha e'lon beriladi.

To'lov muddatlari va shartlari

Talaba chegirmadan keyingi summani bir yo'la yoki bo'lib-bo'lib to'lashi mumkin. Bo'lib to'lashda kontraktning dastlabki to'liq summasiga nisbatan quyidagi ulushlar hisoblanadi:

• 25 foizi - birinchi kursga tavsiya etilganlar uchun 15-oktabrgacha, ikkinchi va undan yuqori kurs talabalari uchun 1-oktabrgacha;
• yana 25 foizi - 1-yanvargacha;
• qolgan 20 foizi - 1-martgacha.

Shu tariqa, talabaning jami to'lovi kontrakt summasining 70 foizini tashkil etadi. Chegirmaga to'g'ri keluvchi 30 foiz esa 1-maygacha davlat byudjeti mablag'lari hisobidan oliy ta'lim tashkilotiga qoplab beriladi.