Prezident Murojaatnomasi: ta'lim va san'at yo'nalishidagi ustuvor vazifalar muhokama qilindi
O'zbekiston davlat xoreografiya akademiyasida Prezident Murojaatnomasining mazmun-mohiyati va sohadagi islohotlarga bag'ishlangan davra suhbati o'tkazildi.
Yangi O'zbekistonda ta'lim, madaniyat hamda san'at yo'nalishlarida olib borilayotgan o'zgarishlar davlat siyosatining ustuvor tarmoqlaridan biri sanaladi. Ayni paytda mamlakatimizdagi idoralar, ta'lim maskanlari va jamoat tashkilotlarida davlat rahbarining Oliy Majlis va xalqimizga yo'llagan Murojaatnomasi mazmunini o'rganishga bag'ishlangan uchrashuvlar tashkil etilmoqda.
Murojaatnoma muhokomalari va asosiy yo'nalishlar
Ana shunday tadbirlardan biri poytaxtimizdagi O'zbekiston davlat xoreografiya akademiyasida bo'lib o'tdi. Davra suhbati davomida Murojaatnomada tilga olingan oltita asosiy ustuvor yo'nalish, ta'limga qaratilayotgan e'tibor, sun'iy intellekt texnologiyalaridan foydalanish, shuningdek, tashqi va ichki aloqalarni rivojlantirish masalalari atroflicha ko'rib chiqildi.
Tadbir avvalida filologiya fanlari doktori, professor Hulkar Hamroyeva so'zga chiqib, hujjatda ma'rifiy va ta'lim sohalari oldiga qo'yilgan vazifalarning ahamiyatini tushuntirib o'tdi.
Oliy ta'lim oldidagi strategik vazifalar
O'zbekiston davlat xoreografiya akademiyasi rektori, professor Shuhrat To'xtasimov 26 dekabr kuni bo'lib o'tgan Murojaatnoma yig'inida shaxsan qatnashganini eslatib, belgilangan marralar hali islohotlarning boshlang'ich bosqichi ekanini ta'kidladi.
- Ta'lim sifatini oshirish va zamonaviy ko'nikmali mutaxassislar tayyorlash;
- Yoshlarning ijodiy salohiyatini qo'llab-quvvatlash;
- San'at va madaniyat yo'nalishidagi OTMlar zimmasiga yuklatilgan mas'uliyat.
Akademiyaning yoshlar masalalari va ma'naviy-ma'rifiy ishlar bo'yicha prorektori Nargiza Alimova yoshlar ta'lim-tarbiyasi hamda ularning ijtimoiy faolligini oshirishda ushbu ustuvor yo'nalishlar muhimligini qayd etdi.
Uchrashuvda professor-o'qituvchilar va yosh mutaxassislar ham o'z fikrlarini bildirib, ta'lim jarayoniga innovatsion usullarni tatbiq etish, sun'iy intellekt imkoniyatlaridan unumli foydalanish hamda xalqaro hamkorlikni kengaytirish orqali akademiya nufuzini yanada oshirish masalalarini muhokama qilishdi.
Manba: UzA
