Qarshi davlat universitetida talabalar uchun yaratilgan sharoitlar kengaytirildi

Prezident Shavkat Mirziyoyev Qarshi davlat universitetiga tashrif buyurib, ta'lim maskanidagi sharoitlarni ko'zdan kechirdi. Hozirgi kunda ushbu oliy o'quv yurtining bakalavriat va magistratura bosqichlarida, shuningdek, kunduzgi, sirtqi hamda masofaviy shakllarda 14 mingdan ortiq talaba tahsil olmoqda. Ularga 579 nafar professor-o'qituvchi saboq bermoqda.

Oliygohda ta'lim dasturlarini xalqaro standartlarga moslashtirish ustuvor vazifa sifatida belgilangan. Xususan, matematika, amaliy matematika, fizika va ingliz filologiyasi yo'nalishlari xalqaro akkreditatsiyadan o'tkazilgan. Shuningdek, Rossiya va Belarus universitetlari bilan hamkorlikda 14 ta qo'shma ta'lim dasturi amalga oshirilmoqda.

Ilmiy tadqiqotlar va zamonaviy markazlar

Tillar fakultetida ming o'rinli zamonaviy media studiya ish boshlagan bo'lib, ingliz, rus, xitoy, nemis va fransuz tillari markazlari faoliyat yuritmoqda. Xalqaro dasturlar asosida sinxron tarjimonlar tayyorlash yo'lga qo'yilgan. Yettita laboratoriyani o'z ichiga olgan Xalqaro laboratoriyalar markazida robototexnika, sun'iy intellekt va mashinali o'qitish yo'nalishlarida ilmiy izlanishlar olib borilmoqda.

Infratuzilma va ijtimoiy sharoitlar

Universitetda o'tgan yili keng ko'lamli rekonstruksiya va qurilish ishlari bajarildi. Uchta yangi yotoqxona qad rostlab, qo'shimcha 1 ming 300 dan ortiq o'rin yaratildi va talabalarning turar joyiga bo'lgan ehtiyoji to'liq qoplandi. Kampus hududida 240 o'rinli bolalar bog'chasi, kutubxona, oshxonalar, anjumanlar saroyi hamda yoshlar markazi ochilgan. Shuningdek, oliygoh qoshida tashkil etilgan "Lochin" futbol jamoasi uchun zamonaviy mashg'ulot maydoni qurib bitkazildi.

Davlat rahbari tashrif davomida universitetning talabalarga xizmat ko'rsatish markazi faoliyati bilan ham yaqindan tanishdi.