Qo'qonda "Dolzarb 90 kun" loyihasi yakunlanib, talabalikka bag'ishlov kechasi o'tkazildi
Qo'qon davlat universitetida "Dolzarb 90 kun" sport musobaqalari g'oliblari taqdirlandi va 1-bosqich talabalari uchun bag'ishlov kechasi bo'lib o'tdi.
10-sentabr kuni "Yoshlar" bog'ida "Dolzarb 90 kun" loyihasi doirasida tashkil etilgan sport musobaqalarining g'oliblarini taqdirlash marosimi hamda Qo'qon davlat universitetining yangi o'quv yiliga bag'ishlangan "Talabalikka bag'ishlov" badiiy kechasi bo'lib o'tdi.
Tadbirda Qo'qon shahar hokimi Marufjon Usmonov, universitet rektori Dilnoza Xodjayeva, professor-o'qituvchilar, talaba-yoshlar hamda shahar jamoatchiligi vakillari ishtirok etdi. Shahar hokimi va universitet rektori tadbirni ochib berib, yoshlarni samimiy qutladilar.
Sport musobaqalari va taqdirlash jarayoni
Shundan so'ng, "Dolzarb 90 kun" loyihasi sport musobaqalari g'oliblarini taqdirlash marosimi bo'lib o'tdi. 10 ming nafardan ziyod yosh ishtirok etgan loyiha yakunlariga ko'ra, sportning turli yo'nalishlarida munosib natija qayd etgan 132 nafar yosh g'olib va sovrindor sifatida e'tirof etildi.
Talabalik qasamyodi va qo'shma ta'lim dasturi
Tadbir davomida Qo'qon davlat universitetining yangi qabul qilingan 1-bosqich talabalari tantanali ravishda talabalik qasamyodini qabul qildilar. Shuningdek, tadbir doirasida Chexiyaning Yevropa amaliy fanlar va menejment instituti bilan hamkorlikda amalga oshirilayotgan qo'shma ta'lim dasturi doirasida bitiruvchi magistrlarga ham diplomlar topshirildi. Kechada taniqli estrada xonandalari, so'z ustalari, opera ijrochilari hamda iqtidorli talabalar tomonidan ijro etilgan kuy-qo'shiqlar, raqslar va sahna chiqishlari yig'ilganlarga bayramona kayfiyat ulashdi.
Manba: UzA
