Samarqand viloyatidagi to'rtta oliy ta'lim muassasasi qayta tashkil etiladi

Samarqand viloyatidagi oliy ta'lim tashkilotlari faoliyatini yanada takomillashtirish chora-tadbirlari to'g'risida prezident qarori qabul qilindi. Ushbu hujjatga asosan hududdagi to'rtta oliygoh faoliyatida o'zgarishlar amalga oshiriladi.

OTMlarni qayta tashkil etish va birlashtirish jarayonlari

• Samarqand davlat arxitektura-qurilish universiteti negizida Samarqand davlat texnika universiteti tashkil etiladi.
• Samarqand davlat universitetiga Toshkent axborot texnologiyalari universiteti Samarqand filiali qo'shib olinadi.
• Samarqand davlat pedagogika institutiga Samarqand davlat universiteti Urgut filiali qo'shib olinadi hamda mazkur filial bazasida Samarqand davlat pedagogika institutining Urgut fakulteti faoliyati yo'lga qo'yiladi.
• Samarqand iqtisodiyot va servis institutiga Toshkent davlat iqtisodiyot universiteti Samarqand filiali qo'shib olinadi.

Malaka oshirish va yangi muhandislik maktabi

2026/27 o'quv yilidan boshlab mazkur qarorda ko'zda tutilgan OTMlarning professor-o'qituvchilari va doktorantlari xorijiy davlatlarning yetakchi oliy ta'lim va ilmiy-tadqiqot tashkilotlariga malaka oshirish hamda ilmiy stajirovkaga yuboriladi. Shuningdek, 2027/28 o'quv yilidan Samarqand davlat texnika universitetida Intellektual suv texnologiyalari ilg'or muhandislik maktabi tashkil etiladi.