Samarqandda maktab o'quvchilarining ekologik bilimlari sinovdan o'tkazildi

Umumiy o'rta ta'lim maktablarining yuqori sinf o'quvchilari ishtirokida "Siz ekologiyaga oid qonunlarni bilasizmi?" respublika ko'rik-tanlovining Samarqand viloyati bosqichi tashkil etildi. Ushbu musobaqa O'zbekiston Ekologiya va iqlim o'zgarishi milliy qo'mitasi, Bosh prokuratura hamda Maktabgacha va maktab ta'limi vazirligi hamkorligida o'tkazildi. Unda tuman va shahar bosqichlarida g'oliblikni qo'lga kiritgan jami 16 ta jamoa o'zaro bahslashdi.

Tanlov shartlari va loyihalar

Ishtirokchilar belgilangan to'rtta shart asosida ekologiyaga oid huquqiy bilimlari va sohaga doir qonunchilikdan qanchalik xabardor ekanliklarini savol-javoblar orqali ko'rsatib berishdi. Shuningdek, jamoalar o'zlari yashab turgan hududlarning ekologik holati hamda aholining ekomadaniyati xususida ma'lumotlar taqdim etdi. Shu bilan birga, yurtimizda ekologik barqarorlikni ta'minlash, atrof-muhitga ehtiyotkorona munosabatda bo'lish masalalariga bag'ishlangan "Eng yaxshi ekologik loyiha"larini namoyish qilishdi.

G'oliblar va respublika bosqichi

Musobaqa yakuniy natijalariga ko'ra, Kattaqo'rg'on shahridagi 8-umumiy o'rta ta'lim maktabi jamoasi birinchi o'rinni egallab, tanlovning mamlakat bosqichiga yo'llanmani qo'lga kiritdi. Faxrli ikkinchi o'rin Jomboy tumanidagi 30-umumiy o'rta ta'lim maktabi o'quvchilariga nasib etdi. Uchunchi o'rinni esa Samarqand shahridagi 55-umumiy o'rta ta'lim maktabi jamoasi egalladi. Ma'lum qilinishicha, mazkur ko'rik-tanlovning respublika bosqichi joriy yilning mart oyida Buxoro shahrida o'tkazilishi rejalashtirilgan.