Soliq oliy maktabida bakalavriat va magistratura yo'nalishlari ochiladi
Soliq oliy maktabida 2026-2027 o'quv yilidan boshlab bakalavriat ta'lim yo'nalishlariga talabalar qabul qilinadi.
Prezidentning tegishli qaroriga asosan, soliq sohasida malakali kadrlar tayyorlashning yangi tizimi joriy etilishi belgilandi. Xususan, Soliq qo'mitasi huzurida tashkil etilgan Soliq oliy maktabida 2026-2027 o'quv yilidan boshlab o'qish muddati kamida uch yil bo'lgan bakalavriat yo'nalishlariga qabul boshlanadi.
Ta'lim jarayoni va yo'nalishlar
2027-2028 o'quv yilidan boshlab esa magistratura hamda oliy ta'limdan keyingi ta'lim bosqichlari o'z faoliyatini boshlaydi. Oliy maktab tarkibida Malaka oshirish va kompetensiyalarni rivojlantirish markazi hamda Soliqqa oid tadqiqotlar markazi ham ish olib boradi.
Yangi ta'lim dargohida quyidagi sohalar bo'yicha mutaxassislar tayyorlanadi:
- Soliqlar va soliqqa tortish
- Raqamli soliq ma'murchiligi
- Soliq huquqi
- Moliyaviy nazorat
Imtiyozlar va sertifikatlar
Oliy maktab bitiruvchilariga davlat namunasidagi diplom beriladi. Shu bilan birga, ular soliq maslahatchisi va auditor malaka sertifikatlarini olish uchun zarur o'quv kurslarini tugatganligini tasdiqlovchi hujjatga ham ega bo'ladilar.
Bundan tashqari, buxgalteriya hisobi va audit yo'nalishidagi ACCA, DipIFR, CAP/CIPA, CIA hamda ACA kabi xalqaro tashkilotlar sertifikatlarini qo'lga kiritgan talabalarning o'qish xarajatlari Soliq oliy maktabi tomonidan to'liq qoplab berilishi ko'zda tutilgan.
Manba: Kun.uz
