Tibbiyotda klinik ordinatura tugatilib, rezidentura tizimiga o'tiladi
Prezident farmoniga asosan tibbiyotda kadrlar tayyorlash tizimi o'zgaradi. 2027-yildan ordinaturaga qabul to'xtatilib, rezidentura joriy etiladi.
O'zbekistonda tibbiyot va farmatsevtika sohasida kadrlar tayyorlash tizimini takomillashtirishga qaratilgan prezident farmoni qabul qilindi. Ushbu hujjatga muvofiq, rezidentura dasturlarining davomiyligi mutaxassisliklarga qarab tabaqalashtiriladi va xalqaro standartlar asosida tashkil qilinadi.
Rezidentura va yangi o'quv yili tartibi
Rezidenturada tor soha mutaxassislarini tayyorlash davlat tibbiyot ta'lim tashkilotlari hamda tibbiyot muassasalarida faqat davlat granti asosida amalga oshiriladi. 2026-2027 o'quv yilidan boshlab oilaviy tibbiyot yo'nalishi bo'yicha rezidentura tashkil etiladi va uni tamomlagan bitiruvchilarga oilaviy shifokor mutaxassisligi beriladi.
2027-2028 o'quv yilidan e'tiboran esa tor soha mutaxassislarini tayyorlash to'liq rezidentura tizimiga o'tkaziladi. Shu munosabat bilan klinik ordinaturaga qabul jarayoni to'xtatiladi. Shuningdek, tibbiyot yo'nalishidagi tor soha mutaxassisliklari bo'yicha magistraturaga umumiy davlat buyurtmasi asosida qabul parametrlari qisqartiriladi.
Moliyalashtirish va stipendiyalar
Ordinaturaga qabulni to'xtatish va magistratura qabul parametrlarini qisqartirish natijasida bo'shaydigan mablag'lar to'g'ridan-to'g'ri rezidenturada mutaxassislar tayyorlashga yo'naltiriladi. Davlat granti asosida rezidenturaga qabul qilingan talabalarga davlat byudjeti hisobidan mehnatga haq to'lashning eng kam miqdorining 2,15 baravari miqdorida stipendiya to'lab beriladi.
Rezidentura ta'lim dasturini muvaffaqiyatli o'zlashtirgan bitiruvchilarga Ta'limning xalqaro standart tasniflagichi va Milliy malakalar ramkasining 7-darajasiga mos keluvchi davlat namunasidagi diplom berilishi belgilandi.
Manba: Kun.uz
