Toshkent amaliy fanlar universitetida grant asosida o'qish imkoniyati e'lon qilindi
Mandatdan keyin Toshkent amaliy fanlar universitetida 25, 50 va 100 foizlik grantlarni qo'lga kiritish imkoniyati ochildi.
Yakuniy mandat natijalaridan so'ng Toshkent amaliy fanlar universiteti (TAFU) abituriyentlar uchun maxsus grant tanlovini boshladi. O'qishga kira olmagan, yetarli ball to'play olmagan yoki boshqa yo'nalishga tavsiya etilgan yoshlar uchun grant asosida o'qishni davom ettirish imkoniyati mavjud.
Grantni qanday qo'lga kiritish mumkin
Ushbu imkoniyatdan foydalanish uchun bir daqiqalik motivatsion video tayyorlash talab etiladi. Videoda o'zingizni tanishtirib, kelajakdagi maqsadlaringiz hamda nima uchun aynan shu yo'nalishda o'qishni xohlayotganingizni tushuntirib berishingiz kerak. Eng yaxshi deb topilgan ishtirokchilar 25, 50 yoki 100 foizlik grantlar bilan taqdirlanadi.
Universitet haqida qisqacha
Toshkent amaliy fanlar universiteti 2021-yilda tashkil etilgan bo'lib, o'tgan davr mobaynida bosqichma-bosqich rivojlandi. Hozirgi kunda OTMning Toshkent shahrining Chilonzor, Sergeli, Mirobod, Uchtepa va Yashnobod tumanlarida zamonaviy kampuslari faoliyat yuritmoqda.
Ta'lim dargohida iqtisodiyot, moliya, pedagogika, axborot texnologiyalari, filologiya, psixologiya, muhandislik va boshqa ko'plab yo'nalishlar bo'yicha mutaxassislar tayyorlanadi. 2025–2026 o'quv yilida 20 ga yaqin ta'lim yo'nalishi bo'yicha 5 mingdan ortiq talaba o'qishni tamomlab, mustaqil hayotga qadam qo'ydi.
Nazariya va amaliyot uyg'unligi
Universitet nomidagi "amaliy fanlar" so'zi ta'lim jarayonining asosiy yo'nalishini belgilaydi. Bu yerda nazariy bilimlarni amaliyot bilan uzviy bog'lashga alohida e'tibor qaratiladi. Talabalar ikkinchi kursdan boshlab o'z bilimlarini amaliyotda mustahkamlash imkoniyatiga ega bo'lib, bu ularni mehnat bozoriga tayyor mutaxassis sifatida chiqarishga xizmat qiladi.
Shuningdek, ta'lim muassasasi xalqaro hamkorlikni kengaytirish, zamonaviy texnologiyalarni joriy etish va xorijiy OTMlar bilan aloqalarni mustahkamlash ustida ishlamoqda. Rasmiy ma'lumotlarga ko'ra, o'tgan o'quv yilida universitet bitiruvchilarining qariyb 60 foizi ish bilan ta'minlangan.
Manba: Kun.uz
