Toshkent davlat agrar universitetini 2030-yilgacha rivojlantirish chora-tadbirlari belgilandi

O'zbekiston Respublikasi Prezidenti “Toshkent davlat agrar universiteti faoliyatini takomillashtirishga oid qo'shimcha chora-tadbirlar to'g'risida”gi qarorni imzoladi. Yangi hujjatga asosan, OTM oldiga 2030-yilga qadar bir qator muhim maqsadli ko'rsatkichlarga erishish vazifasi qo'yildi.

Asosiy rivojlanish ko'rsatkichlari

Qarorga ko'ra, belgilangan asosiy vazifalar quyidagilardan iborat:

• Universitetning xalqaro nufuzini yuksaltirish hamda xalqaro reyting tashkilotlarining top-500 talik oliy ta'lim muassasalari qatoriga qo'shilishini ta'minlash.
• Ta'lim, boshqaruv va xizmat ko'rsatish jarayonlariga raqamli texnologiyalar hamda sun'iy intellektni joriy etish.
• Ilmiy ishlanmalarni tijoratlashtirishdan keladigan tushumlarni 3 baravarga ko'paytirish.
• Xalqaro hamkorlikda bajariladigan ilmiy tadqiqotlarni 3 baravarga, qo'shma ta'lim dasturlarini эса 20 taga yetkazish.
• Xalqaro akkreditatsiyadan o'tgan o'quv dasturlarini 4 baravarga oshirish hamda o'quv-ilmiy laboratoriyalar bazasini 20 foizga kengaytirish.

Agrar ta'lim-ishlab chiqarish kooperatsiyasi

Hujjat bilan agrar sohadagi ta'lim maskanlari, ilmiy-tadqiqot muassasalari va ishlab chiqarish korxonalari hamkorligida yuridik shaxs maqomiga ega bo'lmagan Agrar ta'lim-ishlab chiqarish kooperatsiyasi tashkil etiladi. Unga kiritilgan umumiy o'rta ta'lim maktablarida 2026/2027 o'quv yilidan boshlab 1 tadan 7-11 sinflarda tabiiy fanlar chuqurlashtirilgan tarzda o'qitila boshlaydi. Shuningdek, uch oy muddatda ushbu maktablar uchun tabiiy fanlar bo'yicha maxsus variativ o'quv rejasi ishlab chiqiladi.

Kooperatsiya doirasida ilmiy-tadqiqot muassasalarining yuqori malakali mutaxassislari universitetga biriktirilgan texnikumlar va kafedralarga ilmiy maslahatchi qilib biriktiriladi. Har yili talabalar, o'quvchilar va pedagoglar ilmiy-tadqiqot muassasalarida amaliyot hamda stajirovka o'tashlari yo'lga qo'yiladi. Shuningdek, yuqori sinf o'quvchilari va talabalarni kasbga yo'naltirish maqsadida agrotexnologiyalar hamda ilg'or oziq-ovqat texnologiyalari bilan tanishtiruvchi "dala kunlari" o'tkazib boriladi.