Toshkent davlat o'zbek tili va adabiyoti universitetida karera kuni tashkil etildi

Shu kunlarda ta'lim muassasalarini tamomlayotgan yoshlar oldida eng dolzarb masalalardan biri mos kasb va ish joyini tanlashdir. Bunda ish haqining miqdori, yashash manziliga yaqinligi, qulay ish tartibi va jamoadagi muhit asosiy mezon sanaladi.

Osonish.uz platformasi va uning imkoniyatlari

Talabalarga ko'maklashish maqsadida Alisher Navoiy nomidagi Toshkent davlat o'zbek tili va adabiyoti universitetida "Karera kuni" mehnat yarmarkasi o'tkazildi. Tadbir davomida Kambag'allikni qisqartirish va bandlik vazirligi mutaxassislari tomonidan yangi ishlab chiqilgan “Osonish.uz” tizimi orqali bandlikni ta'minlash yo'llari tushuntirildi.

Masalan, bitiruvchi kurs talabasi Nigora Karimova mazkur platforma yordamida o'ziga yaqin hududdagi maktabni tanlab, rezyumesini yubordi. Maktab direktorining tasdig'idan so'ng u qisqa fursatda ishga joylashdi. Platformada oylik maoshlar ko'rinib turishi, shuningdek, ustama va qo'shimcha to'lovlar mavjudligi qayd etildi. Agar ko'rsatilgan ish o'rni band bo'lsa yoki mavjud bo'lmasa, shikoyat tugmasi orqali uni tizimdan olib tashlash imkoniyati bor.

Universitet bitiruvchilari bandligi

Joriy yilda universitetni 1768 nafar talaba tamomlaydi. Ularning 70 foizida uch tomonlama shartnoma asosida ish joylari oldindan hal qilingan. Qolgan 30 foiz yoshlar esa ko'rsatilgan platforma orqali o'zlariga mos ish o'rinlarini tanlashlari mumkin.

Tadbirda ishtirok etgan 300 nafardan ortiq to'rtinchi kurs talabalarining 20 dan ortig'i o'z rezyumelarini to'ldirib, ulardan 15 nafari ishga qabul qilingani ma'lum qilindi. Ular keyinchalik suhbatdan o'tib, bir-ikki hafta mobaynida ishga qabul qilinish bo'yicha buyruqlar chiqishi ko'zda tutilgan. Shuningdek, nafaqat to'rtinchi, balki milliy til sertifikatiga ega uchinchi kurs talabalari ham ushbu tizim orqali o'zlariga mos bo'sh ish o'rinlarini topishlari mumkinligi tushuntirildi.

• Tadbir yakunida bandlik masalalari, mehnat munosabatlari va amaldagi qonunchilikka oid savollarga mutaxassislar tomonidan batafsil javoblar berildi.