Toshkent davlat sharqshunoslik universitetida “Ibrat farzandlari” markazi ochildi

Yoshlarning sifatli ta'lim olishi, xorijiy tillarni mukammal o'zlashtirishi hamda zamonaviy kasbiy ko'nikmalarni egallashiga qaratilgan sa'y-harakatlar doirasida Toshkent davlat sharqshunoslik universitetida muhim tashabbus hayotga tatbiq etildi. Jumladan, “Ibrat farzandlari” loyihasi doirasida mazkur oliygohda yangi maxsus markaz ochildi.

Tadbirda Toshkent davlat sharqshunoslik universiteti rektori Gulchehra Rixsiyeva hamda loyiha rahbari Rustam Qoriyev ishtirok etib, yangi markazning asosiy maqsad va vazifalari xususida to'xtalib o'tdilar. Mas'ullar yoshlar uchun yaratilgan zamonaviy ta'lim texnologiyalari, infratuzilma hamda yaratilayotgan keng imkoniyatlar haqida batafsil ma'lumot berishdi.

Zamonaviy sharoitlar va imkoniyatlar

Ochilgan markazda talaba-yoshlar uchun maxsus kompyuter xonalari jihozlangan. Mazkur xonalarda o'quvchilar zamonaviy dasturlar va onlayn resurslardan foydalangan holda til o'rganishlari, ilmiy-tadqiqot ishlari olib borishlari hamda turli loyiha faoliyatiga qo'shilishlari mumkin. Shuningdek, bu yerda sharq tillari, yirik g'arb tillari va umumiy xorijiy tillar yo'nalishida muntazam ravishda seminarlar, treninglar hamda mahorat darslari tashkil etiladi. Bu esa talabalarning bo'sh vaqtini mazmunli o'tkazishi va ijodiy salohiyatini yuzaga chiqarishi uchun qulay platformadir.

Kelajakdagi raqobatbardosh kadrlar

Mazkur maskan talabalarning intellektual salohiyatini yuksaltirish, amaliy ko'nikmalarini mustahkamlash hamda xalqaro tajribalarni o'zlashtirishda muhim ahamiyat kasb etadi. Olingan nazariy bilimlar amaliyot bilan uyg'unlashuvi talabalarning bo'lg'usi kasbiy faoliyatiga puxta tayyorgarlik ko'rishini ta'minlaydi. Universitetda shunday markazning faoliyat boshlashi yoshlarning xalqaro maydonda raqobatbardosh mutaxassis bo'lib yetishishida muhim qadam bo'lib, mamlakat taraqqiyotiga o'z hissasini qo'shadigan yetuk kadrarni tayyorlashga xizmat qiladi.