Toshkent davlat yuridik universiteti talabalari uchun ochiq eshiklar kuni o'tkazildi

Yuridik kadrlarni qayta tayyorlash va malakasini oshirish institutida Toshkent davlat yuridik universiteti talabalariga bag'ishlab ochiq eshiklar kuni o'tkazildi. Mazkur tadbir bo'lajak yuristlarning nazariy bilimlarini amaliyot bilan mustahkamlash hamda kelgusidagi kasbiy yo'nalishini to'g'ri tanlashiga ko'maklashish maqsadida tashkil etildi.

Tadbirning boshlang'ich qismida yoshlar institutning asosiy faoliyati, mutaxassislarni qayta tayyorlash va malakasini oshirish yo'nalishlari bilan tanishdi. Shuningdek, ular zamonaviy o'quv jarayonlari hamda tinglovchilar uchun yaratilgan sharoitlarni ko'zdan kechirdi. Tashrif davomida talabalar o'quv auditoriyalari, axborot-resurs markazi va boshqa infratuzilma obektlari bo'ylab ekskursiyada bo'ldi.

Ochiq muloqot va kasbiy rivojlanish

Uchrashuvning ikkinchi qismida institut direktorining o'rinbosari F. Maxmudov ishtirokida ochiq muloqot tashkil etildi. Muloqot chog'ida yuridik sohada kasbiy jihatdan o'sish, zamonaviy huquqshunoslar oldida turgan dolzarb vazifalar hamda nazariy bilimlarni amaliyot bilan uyg'un holda olib borish muhimligi ta'kidlandi. Talabalar o'zlarini qiziqtirgan barcha savollarga mutaxassislardan batafsil javob oldilar. O'tkazilgan bunday uchrashuvlar ta'lim va amaliyot o'rtasidagi hamkorlikni yanada mustahkamlashga xizmat qiladi.