Toshkentda O'zbekiston oliy ta'limida sifatni ta'minlash va AMBA & BGA tajribalari muhokama qilindi

Poytaxtimizda Association of MBAs & Business Graduates Association bilan hamkorlikda oliy ta'lim tizimida sifatni ta'minlashni mustahkamlashga bag'ishlangan xalqaro seminar-trening tashkil etildi. Tadbirda oliy ta'lim tashkilotlari rahbarlari, ta'lim sifatiga mas'ul xodimlar, akademik yetakchilar hamda xalqaro ekspertlar ishtirok etdi.

Biznes ta'limi an'anaviy akademik ta'limdan farqli o'laroq, faqat nazariy bilim berish bilan cheklanmay, bozorda qo'llaniladigan real ko'nikmalarni shakllantirishga qaratilgani bilan ahamiyatlidir. Seminar davomida biznes yo'nalishidagi ta'lim dasturlarini xalqaro talablar asosida akkreditatsiyadan o'tkazish, oliygohlar uchun institutsional rivojlanish strategiyalarini belgilash hamda o'quv dasturlarini global standartlar va mehnat bozori ehtiyojlariga moslashtirish masalalari muhokama qilindi.

Xalqaro hamkorlik va sessiyalar

Kun davomida tashkil etilgan sessiyalarda xalqaro tajribalar, Britaniya biznes maktablari bilan hamkorlik aloqalari, ta'lim sifatini kafolatlash mexanizmlari va innovatsion yondashuvlar ko'rib chiqildi. Assotsiatsiya mutaxassislari o'z taqdimotlari bilan qatnashib, ishtirokchilar bilan interfaol savol-javoblar va davra suhbatlari o'tkazdilar. Mutaxassislar biznes ta'limidagi so'nggi o'zgarishlar va qo'yilayotgan talablar yuzasidan o'z fikrlarini bildirdilar.

Sertifikatlarni topshirish jarayoni

Tadbir yakunida mazkur assotsiatsiyaga a'zo bo'lgan oliy ta'lim tashkilotlariga maxsus sertifikatlar topshirildi. Ushbu jarayon mamlakatimiz oliy ta'lim tizimining xalqaro miqyosda e'tirof etilishida muhim qadamlardan biri sifatida qayd etildi. Ma'lumot o'rnida, mazkur assotsiatsiya biznes boshqaruvi va menejment sohasida ta'lim sifatini oshirish, MBA dasturlarini akkreditatsiyadan o'tkazish hamda oliygohlarni rivojlantirishga ko'maklashuvchi dunyodagi yetakchi xalqaro tashkilotlardan biri hisoblanadi. Mazkur xalqaro tadbir o'zbekistonlik talabalar va mutaxassislar uchun ta'lim sifatini yana-da yuksaltirishga xizmat qiladi.