Toshkentdagi xususiy oliygohlarda bir yillik o'qish narxlari qancha?

Toshkent shahridagi xususiy oliy ta'lim muassasalarida bir yillik o'qish qiymati 11 million so'mdan 135 million so'mgacha yetadi va narxlardagi farq 12 baravarni tashkil qiladi. Oliy ta'lim vazirligining 2025 yil yanvar oyi ma'lumotlariga ko'ra, respublikada jami 208 ta universitet faoliyat yuritib, shundan 100 tasi xususiy va xorijiy OTMlar hisoblanadi. Kontrakt miqdori ta'lim sifati yoki reytingga emas, balki oliygoh modeliga, ya'ni uni kim tashkil etgani, qanday diplom berishi va darslar qaysi tilda olib borilishiga bog'liq. ## Olib borilgan tahlil uchun qanday oliygohlar tanlandi

Toshkentda turli xil universitet modellari faoliyat yuritgani bois ularning narxini to'g'ridan-to'g'ri solishtirish qiyin.

• Mahalliy xususiy oliygohlar: xususiy muassislar ochgan va O'zbekiston litsenziyasi asosida ishlaydigan mahalliy universitetlar.
• Xorijiy hamkorga ega oliygohlar: chet el ta'lim muassasalari bilan hamkorlikda dasturlarni amalga oshiruvchi o'zbekistonlik OTMlar.
• Xorijiy filiallar: xorijiy universitetlarning Toshkentdagi kampuslari bo'lib, asosiy oliygoh dasturlari asosida ishlaydi.
• Xususiy tibbiyot dasturlari: o'qish qiymati yuqori bo'lgan alohida yo'nalishlar segmenti.

O'qish narxlari va yo'nalishlar

Ayni bir universitetning o'zida ham narxlar bir necha baravar farq qilishi mumkin. Odatda gumanitar yo'nalishlar arzonroq, axborot texnologiyalari va xalqaro dasturlar qimmatroq, tibbiyot ta'limi esa eng qimmat segment bo'lib qolmoqda. Narxlar kunduzgi ta'lim shakli uchun keltirilgan.

Yiliga 15 million so'mgacha bo'lgan narxlar davlat namunasidagi diplom beruvchi to'liq o'zbek xususiy oliygohlariga tegishli. Bu yerda asosan pedagogika, iqtisodiyot va gumanitar mutaxassisliklar ustunlik qiladi, IT yo'nalishlari ham bor, ammo ularning soni kam. Qabul jarayoni oliygohning ichki imtihonlari orqali amalga oshiriladi.

Yiliga 15 milliondan 30 million so'mgacha bo'lgan segment eng keng tarqalgan bo'lib, bu guruhga yirik o'zbek oliygohlari, hamyonbop dasturlarni taklif etuvchi koreys universitetlari hamda xorijiy diplom beruvchi ta'lim maskanlari kiradi.