Andijon davlat texnika institutining joriy yilgi bitiruvchilariga diplomlar topshirildi

Bobur shahrida Andijon davlat texnika institutining 2026-yilgi bitiruvchilariga diplom topshirishga bag'ishlangan tantanali marosim tashkil etildi. Ushbu tadbirda institut rahbariyati, professor-o'qituvchilar, ta'lim faxriylari, davlat va jamoat tashkilotlari vakillari, yirik ish beruvchilar, shuningdek, bitiruvchi yoshlar hamda ularning ota-onalari ishtirok etishdi.

Tadbirni kirish so'zi bilan ochib bergan institut rektori, texnika fanlari doktori, professor Umid Turdialiyev mamlakatimizda yosh avlodning sifatli ta'lim olishi va zamonaviy kasb-hunarlarni egallashi yo'lida keng imkoniyatlar yaratilayotganini ta'kidladi. U bitiruvchilarni hayotdagi yangi mas'uliyatli bosqich bilan qutlab, ularning kelgusida yurtimiz taraqqiyotiga munosib hissalarini qo'shishiga ishontirish bildirdi.

Xalqaro g'oliblar va faol talabalar taqdirlandi

Marosim davomida Qozog'istonning Olmaota shahrida o'tkazilgan “Almaty TechCup XII: Age of AI – Future Race” xalqaro chempionatida g'oliblikni qo'lga kiritgan institut talabalariga ehtirom ko'rsatildi. Shu bilan birga, ta'lim, fan, ilmiy-tadqiqot ishlari, innovatsion loyihalar hamda turli xalqaro tanlov va musobaqalarda yuqori natijalarga erishgan bir qator iqtidorli talabalarga Oliy ta'lim, fan va innovatsiyalar vazirining tashakkurnomalari topshirildi.

Shundan so'ng bakalavriat hamda magistratura bosqichini muvaffaqiyatli tamomlagan o'g'il-qizlarga tantanali ravishda diplomlar topshirildi. Ma'lumot uchun, joriy yilda mazkur oliygohni transport, energetika, qurilish, iqtisodiyot va boshqa 30 dan ortiq ta'lim yo'nalishlari bo'yicha jami 1864 nafar yosh muvaffaqiyatli tamomladi. Tantanali marosim yakunida konsert dasturi namoyish etildi.