Vazirlik tarix fani attestatsiya testidagi xatolikni tan oldi

O'tgan yili tarix fanidan o'tkazilgan malaka toifa attestatsiya imtihonidagi savollardan biri pedagoglar o'rtasida jiddiy noroziliklarga sabab bo'lgan edi. O'qituvchilar vazirlik to'g'ri javobni xato deb belgilaganidan norozi bo'lib sudga murojaat qilgan va dastlabki instansiyalarda yutqazgandi. Oradan vaqt o'tib, vazirlik xatolikni tan oldi va to'g'ri javobni belgilagan pedagoglarga ballar qo'shib berilishini ma'lum qildi.

Attestatsiya jarayoni va bahsli savol

Ma'lumki, o'qituvchilar malaka toifasini olish uchun har yili ikki bosqichli attestatsiya sinovlaridan o'tishadi. Birinchi bosqichda spetsifikatsiya bo'yicha fandan 40 ta test savoli, ikkinchi bosqichda esa pedagogik mahoratni aniqlash uchun 10 ta topshiriq beriladi.

2025 yil aprel-may oylarida tashkil etilgan tarix fani test sinovlarining 32-savoli ko'plab e'tirozlarga sabab bo'lgan. Ushbu savolda “Yustinian vafotidan keyin Vizantiyadan Ispaniyani tortib olgan qabila nomini belgilang” deb so'ralgan va undagi to'g'ri javob xato sifatida baholangan.

Pedagogik mahorat va xalqaro baholash ilmiy-amaliy markazi testda to'g'ri javob sifatida “langobardlar” variantini belgilagan. Biroq ko'pchilik o'qituvchilar “vestgotlar” javobi to'g'ri ekanini ta'kidlab, e'tiroz bildirishgan. Tarix o'qituvchilarining so'zlariga ko'ra, yuzlab pedagoglar “vestgotlar” variantini belgilagan va bu holat ijtimoiy tarmoqlardagi so'rovnomalarda ham o'z tasdiqini topgan.

Sud jarayonlari va markaz xulosasi

Markazdan ijobiy javob ola olmagan o'qituvchilar nomidan 4 nafar tarix fani o'qituvchisi Maktabgacha va maktab ta'limi vazirligi ustidan sudga da'vo arizasi kiritgan edi. Biroq ular bir qancha sud instansiyalarida yutqazib qo'yishgan.

Pedagogik mahorat va xalqaro baholash ilmiy-amaliy markazining ma'lum qilishicha, mazkur savol 2025 yil bahordagi malaka toifa attestatsiyasida spetsifikatsiya asosida foydalanilgan bo'lib, u 2022 yilda nashrdan chiqqan 7-sinf jahon tarixi darsligi asosida tuzilgan.