Vengriyaning nufuzli universitetida o'zbek tili kurslari tashkil etiladi
Vengriyaning Segeda universitetida o'zbek tili kurslarini ochish bo'yicha dastlabki kelishuvlarga erishildi.
O'zbekistonning Budapeshtdagi elchixonasi diplomatlari Vengriyaning Segeda universiteti prorektori, professor Zoltan Konya bilan uchrashuv o'tkazdi. Muloqot davomida ikki davlat o'rtasidagi oliy ta'lim va fan sohasidagi hamkorlikni kengaytirish masalalari muhokama qilindi.
Hamkorlik va yangi tashabbuslar
Uchrashuv chog'ida professor Zoltan Konya 2026 yil mart oyida Samarqand shahrida bo'lib o'tadigan O'zbekiston–Vengriya rektorlar forumiga alohida to'xtaldi. Uning ta'kidlashicha, mazkur nufuzli anjuman ikki mamlakat o'rtasidagi ta'lim aloqalarini mustahkamlash hamda yangi uzoq muddatli loyihalarni shakllantirish uchun muhim platforma bo'lib xizmat qiladi.
Vengriya tomoni o'zbekistonlik oliy o'quv yurtlari bilan qo'shma ta'lim hamda tadqiqot tashabbuslarini amalga oshirish, shuningdek, talabalar almashinuv dasturlarini yanada kengaytirishdan manfaatdor ekanini bildirdi.
O'zbek tili kurslari
Muzokaralar natijasida Buxoro davlat pedagogika instituti bilan hamkorlik to'g'risidagi memorandum loyihasini ishlab chiqishga kelishib olindi. Shuningdek, Segeda universitetida o'zbek tili kurslarini yo'lga qo'yish bo'yicha dastlabki kelishuvlarga erishildi. Tomonlar O'zbekiston va Vengriya oliy ta'lim muassasalari o'rtasidagi o'zaro manfaatli aloqalarni chuqurlashtirish maqsadida amaliy hamkorlikni davom ettirishga tayyorligini tasdiqladi.
Manba: Kun.uz
