Yangi O'zbekiston universiteti kampusi qurilishi 2027 yilda yakunlanadi

Yangi O'zbekiston universitetining Yangi Toshkent shahrida barpo etilayotgan yangi binolari 2027 yilda foydalanishga topshirilishi ko'zda tutilgan. Prezident matbuot xizmati ma'lumotiga ko'ra, ta'lim maskani kampusining dastlabki qiymati 200 million dollarni tashkil etib, 50 gektar maydonni o'z ichiga oladi.

Kampus infratuzilmasi va imkoniyatlari

Mazkur loyiha Yangi Toshkent shahrini barpo etish direksiyasi buyurtmasi asosida turkiyalik mutaxassislar bilan hamkorlikda ishlab chiqilgan. Hozirda qurilish ishlarini “Ozgüven” kompaniyasi amalga oshirmoqda. Yangi majmua tarkibida quyidagi obyektlar qad rostlaydi:

• 10 ming talabaga mo'ljallangan 5 ta fakultet binosi va rektorat;
• ming o'rindan ortiq joyga ega kutubxona, muzey, ko'rgazmalar zali hamda multimedia xonalari;
• talabalar uchun ming o'rinli sport majmuasi va suzish havzasi;
• professor-o'qituvchilar va talabalar uchun 2 ming o'rinli yotoqxonalar hamda oshxonalar.

Prezident Shavkat Mirziyoyev 30 dekabr kuni mazkur qurilish ishlari bilan tanishib, ushbu universitetda bajarilayotgan bunyodkorlik ishlari va ta'lim dasturlari boshqa oliy o'quv yurtlari uchun namuna bo'lishi lozimligini ta'kidladi. Shuningdek, davlat rahbari boshqa oliy o'quv yurtlarini ham shunday tarzda ta'mirlash, jihozlash va ta'lim jarayoniga ilg'or texnologiyalarni jalb etish bo'yicha ko'rsatmalar berdi.

Eslatib o'tamiz, Yangi O'zbekiston universiteti 2021 yil 23 iyundagi prezident qaroriga asosan tashkil etilgan bo'lib, o'z binosi qurib bitkazilgunga qadar Jahon iqtisodiyoti va diplomatiya universiteti infratuzilmasidan foydalanib turibdi.

Milliy kutubxona loyihasi

Shuningdek, davlat rahbari Yangi Toshkentdagi 4 gektar maydonda O'zbekiston Milliy kutubxonasining yangi binosi qurilishini ham ko'zdan kechirdi. 4 qavatli binolarning umumiy maydoni 30 ming kvadrat metrdan ziyod bo'lib, bir vaqtning o'zida 1420 nafar kitobxonga xizmat ko'rsatish imkonini yaratadi.