Yashnobod tumanidagi san'at maktabi yonida yangi svetofor o'rnatilmoqda
Deputatlar ko'magida o'quvchilar xavfsizligini ta'minlash maqsadida 10-sonli bolalar musiqa va san'at maktabi oldidagi yo'lga svetofor o'rnatila boshlandi.
Oliy Majlis Qonunchilik palatasi deputati Gulruh A'zamova hamda xalq deputatlari Yashnobod tuman Kengashi deputati A.Kerimov fuqarolarning murojaatlariga ko'ra Yashnobod tumanidagi Dilbog' mahallasida faoliyat yurituvchi 10-sonli bolalar musiqa va san'at maktabiga bordi.
Xavfsizlik muammosi va uning yechimi
Ushbu ta'lim maskani 'Aviasozlar' dehqon bozori yaqinida joylashgani bois, mazkur hududda transport harakati doimo yuqori darajada. Bu esa o'quvchilarning darsga kelib-ketishida jiddiy xavf tug'dirib kelgan. Jumladan, joriy yilning 24-yanvar kuni haydovchining ehtiyotsizligi sababli aynan shu yerda maktab o'quvchisi ishtirokida yo'l-transport hodisasi ro'y bergan edi.
Vaziyat maktab ma'muriyati, mahalla yettiligi hamda bozor xavfsizligiga mas'ul shaxslar bilan birgalikda muhokama qilindi. Deputatlar ota-onalar va ta'lim maskani jamoasining shikoyat hamda takliflarini tingladi. Bolalar xavfsizligini ta'minlash yuzasidan tuman hokimligi va mutasaddi tashkilotlar rahbarlari bilan aloqaga chiqilib, amaliy choralar ko'rildi.
Amalga oshirilgan ishlar
Ko'rilgan chora-tadbirlar natijasida maktab oldidagi ko'chada piyodalar o'tish yo'lakchasi chizildi hamda hududga zamonaviy svetofor o'rnatish ishlari boshlab yuborildi. Shuningdek, xalq vakillari mas'ul idoralarga kelgusida shunday ko'ngilsiz holatlarning oldini olish, haydovchilar orasida yo'l harakati qoidalariga rioya etilishini targ'ib qilish va profilaktik tadbirlarni yanada kuchaytirish bo'yicha tegishli tavsiyalar berdi.
Manba: UzA
