Yuridik kadrlarni tayyorlash instituti Rossiya universiteti bilan hamkorlikni muhokama qildi

Yuridik kadrlarni qayta tayyorlash va malakasini oshirish institutida Rossiyaning Oliy iqtisodiyot maktabi Milliy tadqiqot universiteti huquq fakulteti delegatsiyasi qabul qilindi. Delegatsiya tarkibidan fakultet dekani, yuridik fanlar doktori, professor Vadim Vinogradov, dekanning ilmiy ishlar bo'yicha o'rinbosari, professor Aleksandr Larichev va Xalqaro hamkorlik markazi direktori o'rinbosari Oksana Shabarshova o'rin oldi.

Tomonlar o'rtasidagi uchrashuvda akademik almashinuv imkoniyatlarini kengaytirish, qo'shma ilmiy tadbirlarni tashkil etish hamda ilmiy nashrlarni tayyorlash masalalari atroflicha muhokama qilindi. Muloqot davomida ikki tomonlama aloqalarni yo'lga qo'yish yuzasidan fikr almashildi.

Shuningdek, zamonaviy yuridik yo'nalishlar, jumladan, kiberxavfsizlik, raqamli huquq, yashil iqtisodiyot va xalqaro tijorat huquqi sohalarida o'zaro tajriba almashish hamda qo'shma o'quv kurslarini ochish imkoniyatlari ko'rib chiqildi. Mazkur muloqot huquqiy ta'lim sohasidagi ilmiy aloqalarni kengaytirish va kelgusidagi hamkorlik yo'nalishlarini belgilab olishda muhim qadam bo'ldi.