10-sinf o'quvchilarining o'qishini texnikumlarga ko'chirish tartibi belgilanmoqda
Hukumat qarori loyihasiga ko'ra, umumiy o'rta ta'lim maktablarining 10-sinf o'quvchilarini texnikumlarga o'qishini ko'chirish tartibi joriy etilishi rejalashtirilmoqda.
Muhokamalar portalida kasbiy ta'lim tashkilotlari o'quvchilari o'qishini ko'chirish yoki qayta tiklash, shuningdek, umumiy o'rta ta'lim maktablarining 10-sinf o'quvchilarini texnikumlarga ko'chirish bo'yicha davlat xizmatlarini ko'rsatishning ma'muriy reglamentini tasdiqlash to'g'risidagi hukumat qarori loyihasi muhokamaga qo'yildi.
Loyihaga ko'ra, maktablarning 10-sinf o'quvchilarining o'qishini texnikumlarga ko'chirishga faqat joriy o'quv yilida boshlang'ich kasbiy ta'lim dasturlari asosida maktablarning 9-sinf bitiruvchilari hisobidan shakllantirilgan kunduzgi ta'lim shakliga ruxsat beriladi.
Arizalarni topshirish va hujjatlar
O'qishni ko'chirish bo'yicha arizalarni ro'yxatdan o'tkazish qishki ta'til davrida amalga oshiriladi. Aniqroq aytganda, bu jarayon 28 dekabrdan 17 yanvargacha bo'lgan muddatda Davlat xizmatlari markazlari, Yagona interaktiv davlat xizmatlari portali yoki maxsus platforma orqali bajariladi.
Talabgorlar quyidagi hujjatlarni taqdim etishi talab etiladi:
- o'quvchining shaxsini tasdiqlovchi hujjat (pasport yoki ID-kartadagi JShShIR);
- voyaga yetmaganlar uchun tug'ilganlik to'g'risidagi guvohnoma ma'lumotlari.
Shuningdek, mazkur nizom qoidalari nodavlat kasbiy ta'lim tashkilotlari uchun tavsiyaviy xarakterga ega ekanligi belgilangan. Ayni paytda mazkur hujjat loyihasi jamoatchilik muhokamasi bosqichida turibdi.
Manba: Kun.uz
