2026-2027 o'quv yili uchun 1-sinfga qabul jarayonlari qanday tartibda o'tadi?

2026-2027 o'quv yili uchun 1-sinfga qabul jarayonlari 20-iyundan boshlanadi. Shu munosabat bilan ota-onalarni qiziqtirayotgan asosiy savollarga rasmiy javoblar berildi. Jumladan, farzandni birinchi sinfga joylashtirishda bir vaqtning o'zida bir nechta ta'lim muassasasiga ariza topshirish mumkinmi degan masala oydinlashtirildi.

Maktabgacha va maktab ta'limi vazirligi matbuot xizmatining ma'lumotiga ko'ra, amaldagi tartib bo'yicha ikki yoki undan ortiq maktabga bir vaqtning o'zida ariza yuborish imkoniyati taqdim etilmaydi.

Ariza topshirish muddatlari va tartibi

Joriy yil 20-iyundan 31-iyulgacha bo'lgan davrda bolaning yashash manziliga biriktirilgan mikrohududdagi bitta maktabga hujjat topshirish mumkin. Shundan so'ng, 1-avgustdan 31-avgustgacha mikrohududdan tashqarida joylashgan ikkinchi maktabga ariza yuborish imkoniyati yaratiladi.

Xorijiy fuqarolar farzandlarini qanday ro'yxatdan o'tkazadi?

O'zbekistonda doimiy yoki vaqtincha yashab kelayotgan xorijiy davlat fuqarolari hamda fuqaroligi bo'lmagan shaxslar ham o'z farzandlarini 1-sinfga elektron shaklda joylashtirishlari mumkin.

Buning uchun my.maktab.uz platformasi yoki my.gov.uz Yagona interaktiv davlat xizmatlari portalidagi "Chet el fuqarolari va fuqaroligi bo'lmagan shaxslar farzandlarini O'zbekiston Respublikasining umumiy o'rta ta'lim muassasalariga qabul qilish" xizmati orqali murojaat yuboriladi. 2026-2027 o'quv yili uchun 1-sinfga qabul jarayonlari 20-iyun kuni rasman boshlanishi eslatib o'tildi.