Andijonda o'quvchi yoshlarning bo'sh vaqtini mazmunli tashkil etishga bag'ishlangan seminar o'tkazildi

Andijon viloyati "Kelajak" markazi tashabbusi bilan Oltinko'l tumanidagi 12-umumta'lim maktabida "Maktab maslahatchilari forumi" loyihasini boshlashga bag'ishlangan viloyat seminari bo'lib o'tdi. Mazkur tadbirda markaz xodimlari, shahar va tuman maktabgacha va maktab ta'limi bo'limlari mutaxassislari, yozgi sog'lomlashtirish oromgohlari faoliyat yuritayotgan maktablar vakillari hamda o'quvchi yoshlar qatnashdi.

Seminar va forumning asosiy maqsadlari

Tadbirning ochilish qismida Andijon viloyati "Kelajak" markazi direktori Fayzullo Dadajonov va boshqalar so'zga chiqib, maktab maslahatchilarining o'quvchilar tarbiyasidagi o'rni hamda yoshlarning bo'sh vaqtini mazmunli o'tkazishdagi ahamiyatini alohida ta'kidladilar. Shuningdek, forumning asosiy maqsad va vazifalari atroflicha tushuntirildi.

Seminar davomida maktab maslahatchilari faoliyatini yanada takomillashtirish, yoshlar bilan ishlash jarayonining samaradorligini oshirish hamda ilg'or ish tajribalarini ommalashtirish masalalari muhokama markazida bo'ldi. Ayni paytda Qo'rg'ontepa, Bo'ston, Asaka va Xo'jaobod tumanlarida faoliyat ko'rsatayotgan “Kelajak kemp” yozgi sog'lomlashtirish oromgohlarining ishini yanada samarali yuritish, shuningdek, boshqa shahar va tumanlarda ham shunday oromgohlarni tashkil etish yuzasidan muhim fikr-mulohazalar bildirildi.

Amaliy tadbirlar va ko'rgazmalar

Anjuman doirasida ta'lim dargohlarida tashkil etilgan turli to'garaklarning ko'rgazmalari namoyish etildi. O'quvchilar o'rtasida sport musobaqalari, intellektual "Zakovat" bellashuvlari tashkil etildi. Shuningdek, iqtidorli o'quvchilar o'zlarining shartli loyihalari taqdimotlarini o'tkazdilar va turli madaniy-ma'rifiy tadbirlar bo'lib o'tdi.

Seminardan ko'zlangan asosiy maqsad o'quvchi yoshlarning ijodiy va intellektual salohiyatini yuksaltirish, bo'sh vaqtini unumli o'tkazishni ta'minlash hamda maktab maslahatchilarining bilim darajasi va tajribasini boyitish, ularning ish faoliyatiga ilg'or uslublarni muvaffaqiyatli joriy etishdan iborat bo'ldi.