2027-yildan oliy o'quv yurtlarida rezidentura ta'limi bepul bo'ladi
Prezident qaroriga ko'ra, 2027-yildan boshlab oliygohlarda tor soha mutaxassisligi bo'yicha o'qish bepul tashkil etilib, talabalarga stipendiya to'lanadi.
Kelgusi yil, ya'ni 2027-yildan boshlab oliy o'quv yurtlarida tor soha mutaxassisligi bo'yicha tahsil olish, ya'ni rezidentura tizimi to'liq bepul asosda amalga oshirilishi belgilandi. Shuningdek, ushbu yo'nalishda o'qiydigan talabalarga har oylik 3 million so'm miqdorida stipendiya berilishi ko'zda tutilgan.
Rezidentura muddatlari va klinikalar faoliyati
Mutaxassislik yo'nalishlarining o'qish muddati turlicha bo'lib, ikki yildan besh yilgacha davom etishi belgilandi. Jumladan, oilaviy shifokorlik yo'nalishi bo'yicha tahsil olish ikki yilni tashkil etsa, jarrohlik mutaxassisligi bo'yicha o'qish muddati besh yil etib belgilandi.
Bundan tashqari, oliygohlarga klinikalar biriktirilib, "universitet klinikasi" tizimi amaliyotga tatbiq etildi. Endilikda tibbiyot sohasidagi ilmiy tadqiqotlarning kamida 80 foizi aynan oliygohlar klinikalarida bajarilishi talab etiladi. O'tkaziladigan tadqiqotlarda asosiy e'tibor tashxis qo'yish aniqligini oshirish, davolash samaradorligini yuksaltirish hamda turli asoratlarning oldini olish va kamaytirishga qaratiladi.
Manba: UzA
