Prezident Olimpiadasi g'oliblari uchun imtihonsiz o'qishga kirish imkoniyati beriladi
Olimpiadada rekord yangilagan bitiruvchilar oliy ta'limning sport yo'nalishiga imtihonsiz qabul qilinadi.
Prezident Olimpiadasining ochilish marosimi
Oliy shaharchasida Prezident Olimpiadasining tantanali ochilish marosimi bo'lib o'tdi. Unda hududiy terma jamoalar hamda Osiyo va Paraosiyo o'yinlari g'oliblari ishtirok etdi. Joriy yilgi bellashuvlarda 3,5 mingdan ziyod yosh sportchi 26 ta sport turi bo'yicha bahslashmoqda. Ularga 1,5 ming nafar murabbiy hamrohlik qilmoqda. O'zbekistonda ommaviy sportdan professional sportgacha bo'lgan yaxlit tizim yaratilgani qayd etildi.
Yosh sportchilar uchun yangi imtiyoz va rag'batlar
Olimpiada ishtirokchilari uchun bir qator yangi imkoniyatlar e'lon qilindi. Kelasi yildan boshlab musobaqa g'olib va sovrindorlarining pul mukofotlari 2,5 baravar oshiriladi. Unga ko'ra, birinchi o'rin uchun 25 million so'm, ikkinchi o'rin uchun 12 million so'm hamda uchinchi o'rin uchun 6 million so'm beriladi.
Shuningdek, musobaqada g'olib chiqib, O'zbekiston rekordini yangilagan maktab bitiruvchilari oliy ta'lim muassasalarining sport yo'nalishlariga imtihonsiz, davlat granti asosida qabul qilinadi. Kelgusida sport turlari 35 taga yetkazilib, ularda 14 yoshdan 17 yoshgacha bo'lgan o'quvchilar qatnashishi ko'zda tutilgan. Har yili Olimpiada g'oliblaridan 50 nafari xorijdagi xalqaro o'quv-mashg'ulot yig'inlariga yuboriladi va kelasi yildan boshlab g'oliblarga bir yillik stipendiya tayinlanadi. O'z yo'nalishida eng yaxshi natija ko'rsatgan sport maktablari esa zarur jihozlar bilan ta'minlanadi.
Xalqaro yutuqlar va kelgusi rejalar
So'nggi o'n yilda o'zbekistonlik sportchilar yirik xalqaro musobaqalarda 5 ming 518 ta medalni, jumladan 1 ming 675 ta oltin medalni qo'lga kiritdi. Samarqandda o'tkazilgan Butunjahon shaxmat olimpiadasida yigitlar ikkinchi bor g'olib chiqdi. Yaponiyadagi Yozgi Osiyo o'yinlarida O'zbekiston terma jamoasi 21 ta oltin, 25 ta kumush va 24 ta bronza medal bilan beshinchi o'rinni egalladi. Parasportchilar esa Paraosiyo o'yinlarida 145 ta medalni qo'lga kiritib, umumjamoa hisobida uchinchi o'rinni egallashdi.
Shuningdek, Ozarbayjon bilan birgalikda 20 yoshgacha bo'lgan futbolchilar o'rtasidagi jahon chempionatiga ilk bor mezbonlik qilinishi rejalashtirilgan. Poytaxtdagi Olimpiya shon-shuhrati muzeyi Olimpiya shaharchasiga ko'chirilishi ham ma'lum qilindi.
Manba: UzA
