2030 yilgacha O'zbekistonda maktabgacha ta'lim qamrovi 80 foizga yetkaziladi
O'zbekistonda maktabgacha ta'lim qamrovini 2030 yilga borib 80 foizga yetkazish va bolalarni maktabga tayyorlov guruhlari bilan to'liq qamrab olish rejalashtirilmoqda.
Mamlakatimizda yosh avlodni yetuk salohiyatli qilib tarbiyalash hamda bolalarni maktabgacha ta'limga jalb qilishga qaratilgan sa'y-harakatlar izchil davom ettirilmoqda. Oxirgi 7-8 yil mobaynida bu borada sezilarli natijalar qayd etildi.
Bog'chalar va qamrov ko'rsatkichlari
Qayd etilishicha, mazkur yo'nalishda to'rt mingga yaqin davlat bog'cha binolari yangidan barpo etildi hamda rekonstruksiya qilindi. Natijada maktabgacha ta'lim bilan qamrov darajasi 27 foizdan 77 foizga ko'tarildi. Shuningdek, sohada xususiy sektor ishtiroki kengayib, nodavlat bog'chalar soni 8 baravarga oshdi.
Kelgusidagi ustuvor rejalar
Takomillashtirilayotgan "O'zbekiston – 2030" strategiyasi loyihasida maktabgacha ta'lim tizimini rivojlantirish bo'yicha muhim vazifalar belgilangan bo'lib, unga ko'ra qamrov darajasini bosqichma-bosqich oshirish ko'zda tutilgan:
- 2026 yilda 78 foiz;
- 2027 yilda 78,5 foiz;
- 2028 yilda 79 foiz;
- 2029 yilda 79,5 foiz;
- 2030 yilda 80 foiz.
Bundan tashqari, 2030 yilgacha bolalarni maktabga tayyorlov guruhlari bilan 100 foiz qamrab olish nazarda tutilgan. Ushbu maqsadlarni amalga oshirish uchun Davlat byudjeti, xalqaro moliya institutlari, xususiy sektor, homiylik va grant mablag'larini jalb etish belgilangan. Ayni paytda mazkur strategiya loyihasining jamoatchilik muhokamasi davom etmoqda.
Manba: UzA
