Namanganda faoliyat ko'rsatmagan bog'chalarga subsidiya ajratilgani aniqlandi

Namangan viloyatining Uchqo'rg'on tumanida faoliyat yuritmagan maktabgacha ta'lim tashkilotlarini rasmiylashtirish orqali yirik miqdordagi mablag'ni o'zlashtirish holati fosh etildi. Bosh prokuratura huzuridagi Iqtisodiy jinoyatlarga qarshi kurashish departamentining tuman bo'limi tomonidan o'tkazilgan tekshiruvda tuman maktabgacha va maktab ta'limi bo'limi mas'ullari hamda boshqa shaxslar o'zaro til biriktirgani ma'lum bo'ldi.

Aniqlanishicha, Mehnatobod va Dehqonobod mahallalaridagi xonadonlarda maktabgacha ta'lim tashkilotlari davlat ro'yxatidan o'tkazilgan, biroq mazkur bog'chalar amalda ishlamagan. Shunga qaramay, rasmiy hujjatlarga soxta ma'lumotlar kiritilib, ushbu muassasalarga 1,3 mlrd so'm subsidiya mablag'lari ajratilishiga erishilgan va bu mablag'lar o'zlashtirish yoki rastrata yo'li bilan talon-toroj qilingan.

Jinoyat ishi qo'zg'atildi

Mazkur holat yuzasidan Jinoyat kodeksining 167-moddasi o'zlashtirish yoki rastrata yo'li bilan talon-toroj qilish, 207-moddasi mansabga sovuqqonlik bilan qarash hamda 209-moddasi mansab soxtakorligi alomatlari bilan jinoyat ishi qo'zg'atilgan. Hozirgi vaqtda tergov harakatlari davom ettirilmoqda.