Andijon davlat pedagogika institutida "Bahor malikasi" tanlovi o'tkazildi

Navro'z umumxalq bayrami munosabati bilan Andijon davlat pedagogika institutining Axborot-resurs markazi tashabbusi bilan oliygoh talaba-qizlari o'rtasida "Bahor malikasi" ko'rik-tanlovi tashkil etildi. Mazkur bellashuvda institutning beshta fakultetidan faol, iqtidorli va tashabbuskor talaba-qizlar o'z mahoratlarini sinovdan o'tkazdilar.

Tadbirning ochilish marosimida institut rektorining xotin-qizlar masalalari bo'yicha maslahatchisi Guldona G'aniyeva va boshqalar yig'ilganlarni Navro'zi olam bilan tabrikladi. Shuningdek, mamlakatimizda, jumladan, mazkur oliy ta'lim muassasasida talaba-qizlarning intilishlarini qo'llab-quvvatlash hamda salohiyatini yuzaga chiqarish yo'lida zarur sharoitlar yaratilayotgani alohida qayd etildi.

Tanlov shartlari va maqsadi

Musobaqaning asosiy vazifasi talaba-qizlarning intellektual salohiyati, ijodiy qobiliyatlari, sahna mahorati va nutq madaniyatini rivojlantirishga ko'maklashishdan iboratdir. Qolaversa, yoshlarda milliy qadriyatlarimizga nisbatan hurmat va ehtirom tuyg'ularini mustahkamlash ko'zda tutilgan. Bellashuv davomida ishtirokchilar "tanishtiruv", "she'r o'qish", "savol-javob" hamda ijodiy chiqishlar shartlari bo'yicha o'zlarining bilim va iste'dodlarini namoyish etishdi. Ularning chiqishlari nufuzli hakamlar hay'ati tomonidan adolatli baholab borildi.

G'oliblar aniqlandi

Qizg'in va murosasiz kechgan tan yakuniy natijalariga ko'ra quyidagi talaba-qizlar g'olib deb topildi:

• Birinchi o'rin: Filologiya fakulteti o'zbek tili va adabiyoti yo'nalishi talabasi Ziroatxon Murodilova
• Ikkinchi o'rin: Aniq va tabiiy fanlar fakulteti biologiya yo'nalishi talabasi Muazzamxon Pozilova
• Uchinchi o'rin: Ijtimoiy va amaliy fanlar fakulteti tarix yo'nalishi talabasi Guljahon Yursinova

Musobaqa yakunida barcha g'olib va sovrindor ishtirokchilar institut rahbariyati tomonidan tashakkurnoma hamda esdalik sovg'alari bilan taqdirlandilar.