Andijon davlat texnika instituti Xitoy OTMlari bilan hamkorlikni kengaytirmoqda
Andijon davlat texnika instituti Xitoyning Shimoliy Xitoy texnologiya universiteti bilan qo'shma ta'lim dasturlari va yangi yo'nalishlarni yo'lga qo'ymoqda.
O'zbekiston va Xitoy o'rtasida ilm-fan, ta'lim va innovatsiya yo'nalishlaridagi aloqalar izchil rivojlanib bormoqda. Jumladan, Andijon davlat texnika instituti 2019-yildan buyon Xitoy Xalq Respublikasining Shimoliy Xitoy texnologiya universiteti bilan yaqin sheriklik o'rnatgan. Ushbu hamkorlik natijasida hozirgi kunga qadar 22 nafar talaba qo'shma dasturlarni muvaffaqiyatli tamomlab, har ikki davlat oliy ta'lim muassasasining diplomini qo'lga kiritdi.
Yangi 2+2 qo'shma ta'lim dasturi
Ikki oliygoh o'rtasidagi aloqalarning navbatdagi bosqichida Shimoliy Xitoy texnologiya universiteti bilan 2+2 qo'shma bakalavriat ta'lim dasturini ishga tushirish rejalashtirilgan. Unga ko'ra, talabalar o'qishning dastlabki ikki yilini Andijon davlat texnika institutida, qolgan ikki yilini esa Xitoydagi hamkor universitetda o'tab, yakunda ikkita diplom egasiga aylanishadi. Mazkur dastur doirasida "Axborot tizimlari va texnologiyalari" hamda "Mexatronika va robototexnika" mutaxassisliklari bo'yicha qabul amalga oshirilishi ko'zda tutilgan. Shuningdek, joriy yilda institutda Xitoy tili markazini ochish ham rejalashtirilgan bo'lib, u talabalarning tilni puxta o'zlashtirishi va akademik almashinuvlarda faol bo'lishiga ko'maklashadi.
Professor-o'qituvchilar malakasini oshirish
Ta'lim sifatini oshirish va zamonaviy texnologiyalarni o'quv jarayoniga tatbiq etish borasida ham amaliy ishlar bajarilmoqda. Xususan, Andijon davlat texnika institutining bir guruh professor-o'qituvchilari Xitoyning Xefey shahrida tashkil etilgan "Yangi energiya manbali avtomobillarning asosiy texnologiyalari" nomli xalqaro malaka oshirish kursida qatnashdi. O'quv jarayonida ishtirokchilar elektr va gibrid transport vositalarining tuzilishi, quvvat batareyalari, intellektual transport tizimlari hamda nosozliklarni aniqlash bo'yicha nazariy va amaliy ko'nikmalarini boyitdilar.
Shuningdek, dastur doirasida Xefey shahridagi BYD va CHANGAN avtomobilsozlik bazalariga uyushtirilgan tashriflar davomida elektromobillar ishlab chiqarishning zamonaviy jarayonlari va innovatsion yechimlar yaqindan o'rganildi. Bu kabi xalqaro dasturlar o'qituvchilarning kasbiy salohiyatini yuksaltirishga xizmat qiladi.
Manba: UzA
