Samarqandda inklyuziv ta'limni rivojlantirishga bag'ishlangan respublika amaliy seminari o'tkazilmoqda
Samarqanddagi maktablarda inklyuziv sinflar faoliyati va tajribalariga bag'ishlangan respublika amaliy seminari bo'lib o'tmoqda.
Samarqand shahrida tashkil etilgan "Inklyuziv ta'limni rivojlantirish: muammolar va innovatsion yechimlar" nomli respublika amaliy seminari doirasida mutaxassislar shahardagi 81- va 13-umumiy o'rta ta'lim maktablarida bo'lishdi. Ishtirokchilar mazkur ta'lim maskanlarining inklyuziv ta'lim yo'nalishidagi amaliy tajribalari bilan yaqindan tanishdilar.
Hududdagi inklyuziv sinflar ko'rsatkichi
Bugungi kunda Samarqand viloyatidagi 351 ta maktabda jami 450 ta inklyuziv ta'lim sinfi faoliyat ko'rsatmoqda. Mazkur sinflarda 674 nafar o'quvchi ta'lim olib kelmoqda. Ushbu bolalarning 438 nafari aqliy, 115 nafari esa ruhiy rivojlanishida nuqsoni bor o'quvchilarni tashkil qiladi. Shuningdek, 65 nafar o'quvchi eshitish, 8 nafari ko'rish hamda 48 nafari tayanch harakat tizimida muammolari bo'lgan bolalar sirasiga kiradi.
Xususan, Samarqand shahridagi 81-maktabda 14 nafar, 13-maktabda esa 9 nafar alohida ta'limga ehtiyoji bor o'quvchilar o'z tengdoshlari qatori umumiy dars jarayonlarida qatnashib kelmoqda. Mazkur ta'lim muassasalarining maxsus pedagoglari ushbu toifadagi bolalar bilan ishlash usullari, dars jarayonini tashkil etish jarayoni haqida o'z tajribalarini o'rtoqlashdilar. Shuningdek, jarayon davomida ayrim o'quvchilar va ularning ota-onalari ham taklif etilib, ularning fikr-mulohazalari tinglandi.
Seminar doirasidagi rejalashtirilgan tadbirlar
Maktabgacha va maktab ta'limi vazirligi hamda Samarqand viloyati hokimligi hamkorligida tashkil etilgan ushbu seminar ishtirokchilarining navbatdagi kuni Maktabgacha va maktab ta'limi vaziri bilan ochiq muloqotda qatnashishi ko'zda tutilgan.
Manba: UzA
