Andijonda o'qituvchilar uchun yo'l harakati qoidalari bo'yicha seminar o'tkazildi

Andijon viloyati IIB JXX Yo'l harakati xavfsizligi boshqarmasi tashabbusi bilan o'quvchi yoshlarga yo'l harakati qoidalarini samarali o'qitish va o'rgatish, shuningdek, mutaxassislarning bilim va malakalarini oshirishga bag'ishlangan maxsus seminar-trening tashkil etildi.

Mazkur tadbir Marhamat va Izboskan tumanlari Maktabgacha va maktab ta'limi bo'limi hamkorligida o'tkazildi. Unda umumta'lim maktablarining bolalarga yo'l harakati qoidalarini o'rgatishga ixtisoslashgan o'qituvchilari ishtirok etdi. Trening davomida ushbu yo'nalishda tumanlarda amalga oshirilayotgan ishlar, erishilgan yutuqlar hamda mavjud muammolar atroflicha tahlil qilindi.

Tadbirning asosiy maqsadi yosh avlod ongida yo'l harakati madaniyatini shakllantirish, o'quvchilarning bu boradagi bilimlarini oshirishdan iborat. Shuningdek, o'quvchilarga harakat xavfsizligi qoidalarini to'g'ri va samarali yetkazish hamda bolalar ishtirokidagi yo'l-transport hodisalarining oldini olish masalalariga alohida e'tibor qaratildi.

Viloyat YHXB katta mutaxassisi Abdumajid Raimjonovning ta'kidlashicha, seminar davomida mutaxassislar ishtirokchilarga yo'l harakati qoidalarini o'qitishning zamonaviy usullari va interaktiv yondashuvlar yuzasidan amaliy tavsiyalar bergan. Shuning yaniq, yuzaga kelishi mumkin bo'lgan ko'ngilsiz holatlarning oldini olish yo'llari tushuntirildi.

Sessiya yakunida o'qituvchilar o'zlarini qiziqtirgan barcha savollarga mutaxassislardan batafsil javoblar olishdi.