Berdaq nomidagi Qoraqalpoq davlat universiteti va Osaka universiteti hamkorlikni muhokama qildi
Qoraqalpoq davlat universitetida Yaponiyaning Osaka universiteti professori bilan oliy ta'lim va fan sohasidagi hamkorlik masalalari muhokama qilindi.
Yaponiyaning nufuzli ta'lim maskanlaridan biri bo'lgan Osaka universiteti professori hamda National Geographic jamiyati koordinatori Ken Ito Berdaq nomidagi Qoraqalpoq davlat universitetiga tashrif buyurdi. Mehmonni universitet rektori Berdiyar Jollibekov qabul qildi.
Muloqot davomida ikki oliy ta'lim muassasasi o'rtasida ilm-fan va ta'lim yo'nalishlarida xalqaro aloqalarni kengaytirish masalalari ko'rib chiqildi. Xususan, atrof-muhitni muhofaza qilish va ekologiya yo'nalishida qo'shma loyihalarni hayotga tatbiq etishga alohida e'tibor qaratildi. Professor Ken Ito kelgusida Qoraqalpog'iston hududidagi cho'llanish, iqlim o'zgarishi, biologik xilma-xillikni asrash hamda ekologik muammolarni o'rganishga qaratilgan xalqaro loyihalarda hamkorlik qilishga tayyor ekanini bildirdi.
Akademik almashinuv va ilmiy tadqiqotlar
Uchrashuvda tomonlar talaba-yoshlar hamda professor-o'qituvchilarning akademik mobilligini ta'minlash masalalarini ham muhokama qilishdi. Shuningdek, o'zaro tajriba almashish, uzoq va qisqa muddatli stajirovkalar o'tash, qo'shma ilmiy izlanishlar olib borish, shuningdek, seminar va ma'ruzalar uyushtirish istiqbollari ko'rib chiqildi. Bu boradagi mavjud imkoniyatlar atroflicha tahlil qilinib, tegishli takliflar bildirildi.
Rektor Berdiyar Jollibekov o'z navbatida universitet xalqaro hamkorlikni rivojlantirishga ustuvor ahamiyat qaratishini qayd etdi. Unga ko'ra, tabiiy resurslardan oqilona foydalanish, barqaror rivojlanish va ekologiya sohalarida nufuzli xorijiy OTMlar bilan sheriklik aloqalarini o'rnatish asosiy vazifalardan biridir.
Muzokaralar yakunida tomonlar o'zaro manfaatli sheriklikni izchil davom ettirish, belgilangan tashabbuslarni bosqichma-bosqich bajarish hamda kelgusida aniq loyihalar doirasida aloqalarni yanada mustahkamlash bo'yicha kelishuvga erishdilar. Mazkur uchrashuv Qoraqalpoq davlat universitetining ilmiy salohiyatini oshirish, xalqaro nufuzini yuksaltirish va global ekologik muammolarni hal etishda xalqaro hamkorlikni kengaytirishga xizmat qiladi.
Manba: UzA
