Britaniya hukumati vakillari A.Avloniy nomidagi institut faoliyati bilan tanishdi
Britaniya Kengashi va Buyuk Britaniya hukumati vakillari A.Avloniy nomidagi pedagogik mahorat milliy institutida bo'lib, hamkorlik masalalarini muhokama qilishdi.
Britaniya delegatsiyasining institutga tashrifi
Respublikada olib borilayotgan ochiqlik siyosati natijasida xalqaro aloqalar kengayib bormoqda. O'zbekiston ta'lim tizimi bilan yaqindan tanishish maqsadida Buyuk Britaniya hukumati hamda Britaniya Kengashi vakillari A.Avloniy nomidagi pedagogik mahorat milliy institutiga tashrif buyurdi.
Mehmonlar ishtirokida tashkil etilgan muloqot davomida pedagoglarning kasbiy mahoratini oshirish tizimini yanada takomillashtirish masalalari ko'rib chiqildi. Xususan, kelgusidagi sheriklik aloqalari, jumladan, ingliz tili o'qituvchilarining malakasini oshirishga qaratilgan yangi tashabbuslar atroflicha muhokama qilindi.
Uzluksiz kasbiy rivojlanish markazi faoliyati
Tashrif doirasida Buyuk Britaniya vakillari institut tarkibidagi Uzluksiz kasbiy rivojlanish markazi (CPD hub) ishi bilan yaqindan tanishish imkoniga ega bo'lishdi. Shuningdek, markaz va boshqa amaldagi loyihalar qatnashchilari bilan muloqotlar tashkil etildi.
Suhbatlar chog'ida uzluksiz kasbiy rivojlanishning zamonaviy modelini amaliyotga tatbiq etish jarayonlari, erishilgan natijalar hamda kelgusi rivojlanish bosqichlari yuzasidan o'zaro fikr almashildi. Bo'lib o'tgan uchrashuv ikki tomonlama hamkorlikni yanada mustahkamlash, ilg'or xorijiy tajribalarni tatbiq etish hamda ta'lim sifatini yuksaltirishga xizmat qilishi qayd etildi.
Manba: UzA
