Buxoro davlat texnika universiteti talabalari “Asia Trans Gas” korxonasida amaliyot o'tadi

Buxoro davlat texnika universitetining 24 nafar talabasi “Asia Trans Gas” MCHJ QKda ishlab chiqarish amaliyotini muvaffaqiyatli yakunladi. Global energetika tuzilmasi o'zgarayotgan davrda neft-gaz tarmog'ini malakali kadrlarsiz rivojlantirib bo'lmaydi. Mazkur qo'shma korxona O'zbekiston va Xitoy o'rtasidagi energetika hamkorligining namunasi bo'lib, fan, ta'lim va ishlab chiqarishni uyg'unlashtirishga xizmat qiladi.

Amaliyot jarayoni va treninglar

Ikki hafta davom etgan dasturning ilk kunida yoshlar korxona rahbariyati bilan uchrashishdi. 14 kunlik muddatda talabalar Buxoro viloyat magistral gaz quvurlari boshqarmasi texnik bo'limi, texnik xizmat ko'rsatish va ta'mirlash markazi hamda laboratoriyaga tashrif buyurishdi. Shuningdek, sanoat xavfsizligi, uskunalar va ishlab chiqarish jarayonlariga bag'ishlangan maxsus treninglarda qatnashib, tajribali mutaxassislar yordamida nazariy bilimlarini mustahkamlashdi.

Zamonaviy tizimlar bilan tanishuv

Ishlab chiqarish jarayonida yoshlar Markaziy dispetcherlik boshqarmasida bo'lib, gaz quvurlari tizimini real vaqt rejimida monitoring qilish tamoyillari va avtomatlashtirish jarayonlarini ko'zdan kechirishdi. 2-sonli kompressor stansiyasiga uyushtirilgan tashrif esa ularga asosiy ishlab chiqarish uskunalarining ishlash tamoyillarini yaqindan o'rganish imkonini berdi. Talabalar bu yerda kompressor agregatlari va elektr uskunalari bo'yicha mutaxassislar bilan muloqot qilishdi.

Ushbu amaliyot dasturi OTM va korxona o'rtasidagi kadrlar tayyorlash borasidagi samarali hamkorlikning yana bir ko'rinishi bo'ldi.