Buxoroda ko'zi ojiz abituriyentlarni oliy ta'limga qabul qilish jarayonlari o'tkazildi

2026/2027 o'quv yili uchun davlat oliy ta'lim muassasalariga hujjat topshirish jarayonlarida inklyuziv ta'lim tamoyillarini amalga oshirish va barcha yoshlarga teng sharoitlar yaratish ustuvor vazifa bo'lib qolmoqda. Vazirlar Mahkamasining 2025-yil 13-sentabrdagi tegishli qarori bilan tasdiqlangan Nizomga asosan, ko'zi ojiz abituriyentlarni OTMga qabul qilish belgilangan tartibda olib borilmoqda.

Joriy o'quv yilida Buxoro viloyatida yashovchi ko'zi ojiz toifasidagi 39 nafar abituriyent ro'yxatga olindi. Ularni markazlashgan tarzda ro'yxatdan o'tkazish mas'uliyati Buxoro davlat universitetiga yuklatildi. Hujjatlarni ko'rib chiqish natijalariga ko'ra, 13 nafar abituriyent ro'yxatdan o'tkazildi. Ularning 8 nafari Buxoro davlat universitetiga, 3 nafari Buxoro davlat pedagogika institutiga, shuningdek, 1 nafardan O'zbekiston milliy pedagogika universiteti hamda Buxoro davlat texnika universitetiga o'qish uchun hujjat topshirgan.

Buxoro davlat universitetida mazkur toifadagi abituriyentlar uchun qabul imtihonlari, jumladan suhbat jarayonlari Nizom talablari asosida uyushtirildi. Imtiyozli abituriyentlarning bilimini xolis baholash maqsadida barcha zarur sharoitlar muhayyo qilindi. Bunday amaliy yondashuv imkoniyati cheklangan yoshlarning oliy ta'lim olishga bo'lgan huquqlarini kafolatlash, inklyuziv ta'limni rivojlantirish hamda ularning jamiyat hayotidagi faolligini oshirishga xizmat qiladi.