Chekka hududlardagi maktablarga maxsus avtobuslar topshirildi
HAYOT Foundation loyihasi doirasida chekka hududlardagi to'rtta maktabga o'quvchilar uchun avtobuslar berildi.
Mamlakatimizning olis hududlarida yashovchi bolalar darsga qatnash uchun har kuni yuzlab metrlab masofani piyoda yoki velosipedda bosib o'tishga majbur bo'ladi. Ayrim o'quvchilar ta'lim maskaniga yetib borish uchun yarim soatdan to ikki soatgacha vaqt sarflaydi. Ma'lumotlarga ko'ra, respublikadagi 146 mingdan ziyod o'quvchi darsga piyoda qatnaydi.
Maktabgacha va maktab ta'limi
Ushbu muammoni hal etish maqsadida HAYOT Foundation ijtimoiy platformasining Maktabga xavfsiz harakat loyihasi ishga tushirildi. 23 aprel kuni boshlangan mazkur tashabbusning ilk amaliy bosqichi doirasida Qoraqalpog'iston Respublikasi, Surxondaryo, Qashqadaryo va Samarqand viloyatlarining olis hududlaridagi 4 ta ta'lim muassasasiga maxsus avtobuslar topshirildi. Xususan, Qoraqalpog'iston Respublikasi Mo'ynoq tumani, Qashqadaryo viloyati Kitob tumani, Surxondaryo viloyati Termiz tumani hamda Samarqand viloyati Nurobod tumanlaridagi bittadan maktablar tanlab olindi. Masalan, Mo'ynoq tumanidagi 18-maktab o'quvchilari bo'lgan aka-uka Kuvanishboy va Rustam Kuvatbayevlar ta'lim maskaniga kelish uchun 26 kilometrlik masofani piyoda yoki velosipedda bosib o'tishadi.
Kelgusi rejalar
Taqdim etilgan yangi transport vositalari bolalarning ta'lim dargohiga qatnashini sezilarli darajada yengillashtirib, ularning xavfsizligini ta'minlashga xizmat qiladi. Loyiha rahbarining so'zlariga ko'ra, keyingi bosqich avgust oylarida, ya'ni yangi o'quv yili boshlanishiga qadar amalga oshiriladi. Buning uchun Maktabgacha va maktab ta'limi vazirligi mutaxassislari bilan hamkorlikda hududlar yana o'rganilib, maxsus ro'yxat shakllantiriladi.
Manba: Kun.uz
