Guliston davlat universitetining tibbiyot fakultetida hindistonlik yoshlar ham o'qimoqda
Guliston davlat universiteti Tibbiyot fakultetida mamlakatlararo xalqaro hamkorlik doirasida hindistonlik talabalar tahsil ola boshladi.
Xalqaro hamkorlik doirasidagi ta'lim jarayoni
Guliston davlat universitetining Tibbiyot fakultetida respublikaning turli hududlaridan kelgan yoshlar qatori xorijlik talabalar ham bilim olmoqda. O'zbekiston va Hindiston davlatlari o'rtasidagi xalqaro hamkorlik aloqalari doirasida bu yerda hindistonlik talabalar tahsil olishni boshladi. Fakultet dekani, tibbiyot fanlari nomzodi Farhod Shernazarovning ta'kidlashicha, mazkur yangilik oliygohning global ta'lim maydonidagi mavqeini mustahkamlash barobarida madaniy aloqalarni rivojlantirishda muhim ahamiyat kasb etadi.
Tibbiyot yo'nalishidagi o'quv dasturlari amaliyot bilan uzviy uyg'unlikda olib borilmoqda. Talabalarga inson salomatligini tiklash bo'yicha zarur bilimlar tajribali mutaxassislar tomonidan berilmoqda. Shuningdek, darslarni yuqori saviyada tashkil etish uchun zarur shart-sharoitlar yaratilib, o'quv qurollari, inventarlar hamda multimedia vositalari bilan to'liq ta'minlangan.
Talabalar taassurotlari va muloqot
Hindistonlik talabalardan biri Muhammad Kalam Alansiya O'zbekiston tarixi boy ekanini, Hindistonda hukmronlik qilgan Boburiylar va tib ilmining sultoni Ibn Sino shu yurt farzandi ekanini e'tiborga olib, ayniqsa Sirdaryo viloyatidagi Guliston davlat universitetining Tibbiyot fakultetini tanlaganini bildirdi. U o'qish sharoitlari yomon emasligini, o'zbekistonliklarning mehmondo'stligi, samimiyligi va milliy taomlari katta taassurot qoldirganini qayd etdi.
Universitetda yoshlar yetakchisi Yorqinjon Hayitboyev va o'qituvchilar ishtirokida xorijlik talabalar bilan ochiq muloqot uyushtirildi. Uchrashuvda talabalarning universitet hayoti, ilmiy hamda madaniy tashabbuslari bo'yicha fikr va takliflari o'rganilib, mahalliy muhitga moslashish jarayonidagi imkoniyatlar muhokama qilindi. Tadbir yakunida yoshlar yetakchisi tomonidan hindistonlik talabalarga o'zbek milliy bosh kiyimi do'ppi hamda muallifning "Muhabbat semestri" nomli she'riy to'plami sovg'a qilindi.
Manba: UzA
