Ikkinchi oliy ta'lim uchun onlayn hujjat topshirish boshlandi

Oliy ta'lim muassasalariga ikkinchi va undan keyingi oliy ma'lumot olish istagida bo'lgan nomzodlarning arizalari faqat elektron shaklda qabul qilinadi. Qabul jarayoni 2026 yil 10 avgustga qadar (shu kuni ham) davom etadi va hujjatlar my.edu.uz platformasi orqali topshiriladi.

Talab etiladigan hujjatlar

Onlayn ariza yuborish jarayonida fuqarolik pasporti yoki ID-karta ma'lumotlari, bakalavr diplomi va uning ilovasining elektron nusxasi hamda o'qish istagi bildirilgan oliy ta'lim tashkiloti va ta'lim yo'nalishi haqidagi ma'lumotlar talab etiladi. Shuningdek, 1992 yil 1 yanvardan keyin xorijiy davlatlar OTMlari tomonidan berilgan diplomlar belgilangan tartibda nostrifikatsiyadan o'tkazilgan bo'lishi shart.

Kvotalar va to'lov shartlari

Qabul parametrlari hamda kvotalar har bir oliy ta'lim muassasasi tomonidan mustaqil ravishda belgilanadi. Bunda universitet yoki institutning moddiy-texnik bazasi hamda ilmiy-pedagogik salohiyati inobatga olinadi. Ma'lum qilinishicha, ikkinchi va undan keyingi oliy ta'limda o'qish jarayoni to'liq to'lov-kontrakt asosida amalga oshiriladi.