Muddatli harbiy xizmatchilar uchun kirish test sinovlari ruxsatnomalari berildi

Abituriyent ruxsatnomalarini yuklab olish jarayoni boshlandi

2026/2027-o'quv yili uchun oliy va professional ta'lim muassasalariga kirish test sinovlarida ishtirok etadigan abituriyentlar uchun ruxsatnomalarni internet orqali yuklab olish imkoniyati yaratildi. Ushbu jarayon doirasida Janubi-g'arbiy maxsus harbiy okrug tasarrufidagi Termiz garnizonida muddatli harbiy xizmatni o'tayotgan yigitlarga ham ruxsatnomalarni qo'lga kiritishda amaliy ko'mak ko'rsatildi.

Harbiy qismlarda yaratilgan sharoitlar

Harbiy xizmatchilarning oliy ta'lim olishga bo'lgan intilishlarini qo'llab-quvvatlash hamda ularning o'qishga kirish imkoniyatlarini kengaytirishga alohida e'tibor qaratilmoqda. Xususan, harbiy qismlardagi elektron kutubxonalarning kompyuterlaridan foydalangan holda xizmatchilar o'zlarining shaxsiy kabinetlari orqali test sinovlarida qatnashish huquqini beruvchi hujjatni yuklab olishdi.

Mutaxassislar ko'magida Bilim va malakalarni baholash agentligining rasmiy platformasiga kirgan muddatli harbiy xizmatchilar ruxsatnomadagi ma'lumotlarning to'g'riligini tekshirib olishdi. Shuningdek, ularga imtihon jarayonlari bilan bog'liq muhim tartib-taomillar, talab etiladigan hujjatlarni rasmiylashtirish tartibi yuzasidan zarur tushuntirishlar berildi. Bo'sh vaqtlarida o'quv adabiyotlari va elektron resurslardan foydalangan holda o'z bilimlarini mustahkamlab kelayotgan harbiy xizmatchilar uchun bu kabi amaliy yordamlar Janubi-g'arbiy maxsus harbiy okrugda izchil davom ettirilmoqda.