Jarqo'rg'onda o'qituvchilardan majburiy pul yig'ish topshirig'i berilgani tasdiqlandi

Surxondaryo viloyatining Jarqo'rg'on tumanida o'qituvchilardan majburiy tarzda pul yig'ish topshirig'i berilgani o'z tasdiqini topdi. Mazkur holat tuman hokimligining axborot xizmati tomonidan o'tkazilgan o'rganish natijalarida ma'lum qilindi.

O'rganish natijalari va ko'rilgan choralar

Hokimlikning rasmiy munosabatiga ko'ra, o'rganish jarayonida ayrim mansabdor shaxslar tomonidan belgilangan tartiblarga zid ravishda topshiriq berilgan holat aniqlangan. Xususan, tuman hokimining yoshlar siyosati, ijtimoiy rivojlantirish va ma'naviy-ma'rifiy ishlar bo'yicha o'rinbosari Anvar Rajabov tomonidan amaldagi qonunchilik talablariga mos kelmaydigan ko'rsatma berilgani tasdiqlangan. Mazkur holat yuzasidan unga nisbatan belgilangan tartibda navbatdagi intizomiy jazo chorasi qo'llandi. Shuningdek, mansabdor shaxsdan kelgusida bu kabi qonunbuzilish holatlariga yo'l qo'ymaslik, xizmat vakolatlarini amalga oshirishda qonuniylik va mas'uliyat tamoyillariga qat'iy rioya etish bo'yicha tushuntirish xati olindi hamda rasmiy ogohlantirildi.

Ehson va xayriya tadbirlari

Rasmiy bayonotda har qanday xayriya hamda ehson tadbirlari faqat ixtiyoriylik asosida, amaldagi me'yoriy-huquqiy hujjatlar doirasida amalga oshirilishi shartligi alohida ta'kidlangan. Kelgusida bunday holatlarning oldini olish maqsadida barcha mas'ul rahbar va mansabdor shaxslar bilan qo'shimcha tushuntirish ishlari olib borilayotgani hamda ichki nazorat kuchaytirilgani bildirildi.

Avvalroq, Jarqo'rg'on tumanidagi 33-umumta'lim maktabida o'qituvchilardan majburiy pul yig'ish bo'yicha topshiriq berilgani haqida xabarlar tarqalgan edi. Maktab direktori Oysara Uzoqova o'z topshirig'ida tuman hokimi o'rinbosari telefon qilib, belgilangan muddatda pulni hokimiyatga olib borib berishni talab qilganini yozgandi.