Jizzaxdagi texnikumda Germaniya markazi vakillari bilan hamkorlik muhokama qilindi

Jizzax viloyatining Sharof Rashidov tumanidagi 3-sonli texnikumga Germaniyaning ZAW-Leipzig markazi ijrochi direktori doktor Matias Mayer boshchiligidagi delegatsiya tashrif buyurdi.

Mazkur tashrif doirasida Jizzax viloyati Kasbiy ta'limni rivojlantirish va muvofiqlashtirish hududiy boshqarmasi boshlig'i Sarvar Nazarqosimov hamda Sharof Rashidov tumani hokimi o'rinbosari ishtirokida uchrashuv tashkil etildi. Mehmonlar ta'lim maskanidagi o'quv-amaliyot xonalari, yaratilgan shart-sharoitlar hamda o'quv jarayoni bilan yaqindan tanishdilar.

Hamkorlik yo'nalishlari va istiqbollar

Muloqot davomida kasbiy ta'lim tizimini xalqaro ilg'or tajribalar asosida takomillashtirish masalalari ko'rib chiqildi. Shuningdek, yoshlarni zamonaviy kasb-hunarlarga yo'naltirish, ularning amaliy ko'nikmalarini oshirish hamda istiqbolli hamkorlik yo'nalishlari yuzasidan atroflicha muzokaralar olib borildi.

Delegatsiya a'zolariga ta'lim muassasasida amalga oshirilayotgan islohotlar va o'quvchilarning bilim hamda malakasini mustahkamlashga qaratilgan amaliy loyihalar haqida batafsil ma'lumot taqdim etildi. Mutaxassislarning fikricha, bunday xalqaro aloqalar hududda kasbiy ta'lim sifatini yuksaltirish, raqobatbardosh kadrlar tayyorlash va yoshlarni zamon talablariga mos kasblarga yo'naltirishda muhim o'rin tutadi.