Kasbiy ta'lim agentligi va O'zbekipaksanoat uyushmasi hamkorlikni yo'lga qo'ydi

Poytaxtda “O'zbekipaksanoat” uyushmasi raisi R.Abdullayev va Oliy ta'lim, fan va innovatsiyalar vazirligi huzuridagi Kasbiy ta'lim agentligi direktori A.Husanov uchrashuvi bo'lib o'tdi. Muloqot davomida ipakchilik tarmog'i uchun zamonaviy bilim hamda amaliy ko'nikmaga ega bo'lgan malakali o'rta bo'g'in mutaxassislarini tayyorlash masalalari atroflicha muhokama qilindi.

Mamlakatda ipakchilikni yanada rivojlantirish, pilla yetishtirish jarayonlarini takomillashtirish, ozuqa bazasini mustahkamlash va aholi bandligini ta'minlash maqsad qilingan. Tomonlar kasbiy ta'lim tizimini ishlab chiqarish jarayonlari bilan yanada yaqin integratsiya qilish, dual ta'limni rivojlantirish, shuningdek, mehnat bozori talablariga to'la mos keladigan kadrlar tayyorlash yuzasidan o'zaro fikr almashdi.

Anglashuv memorandumi imzolandi

Tadbir yakunida idoralar o'rtasida kasbiy ta'lim sohasidagi sheriklikni yanada kuchaytirishga qaratilgan Anglashuv memorandumi imzolandi. Mazkur hujjat doirasida sohaga oid o'quv dasturlarini zamon talablariga moslashtirish, ishlab chiqarish amaliyotlarini samarali tashkil etish hamda pedagoglarning malakasini oshirish ko'zda tutilgan.

Shuningdek, hujjatda xorijiy tillarni o'qitishni kuchaytirish, qisqa muddatli kasb-hunar kurslarini tashkil etish hamda qo'shma seminarlar, forumlar va kasbiy mahorat musobaqalarini o'tkazish masalalari belgilandi. Bundan tashqari, texnikum bitiruvchilarini tarmoq korxonalaridagi mavjud bo'sh ish o'rinlariga keng jalb qilish bo'yicha ham amaliy ishlar amalga oshirilishi kelishib olindi.