Maktab bitiruvchilari uchun yakuniy davlat attestatsiyasi sinovlariga tayyorgarlik boshlandi

2025-2026 o'quv yili yakunida umumta'lim maktablari bitiruvchilarining yakuniy davlat attestatsiyasiga tayyorgarlik jarayonlari davom etmoqda. Hozirgi vaqtda imtihon o'tkaziladigan fanlar bo'yicha savol variantlarini aniqlash maqsadida qur'a tashlash tadbirlariga start berildi.

Jumladan, 11-sinf o'quvchilari uchun Ona tili va adabiyot, shuningdek, davlat tilida ta'lim olinmaydigan sinflar uchun Davlat tili fanidan imtihon variantlarini tanlash bo'yicha qur'a tashlash jarayonlari tashkil etilmoqda.

Imtihon variantlarini tanlash tartibi

Amaldagi qoidalarga muvofiq, yakuniy davlat attestatsiyasining yozma imtihonlari uchun oldindan tayyorlangan variantlar orasidan sinov sanasidan bir kun oldin qur'a tashlash yo'li bilan ikkita variant tanlab olinadi. Mazkur tartib barcha bitiruvchilar uchun teng imkoniyatlar yaratish, bilim va ko'nikmalarni adolatli baholash hamda jarayonlarning shaffof va ochiq o'tishini ta'minlashga xizmat qiladi.