Maktabgacha va maktab ta'limi vaziri deputatlar savollariga javob berdi

Oliy Majlis Qonunchilik palatasida O'zbekiston Xalq demokratik partiyasi fraksiyasi hamda Fan, ta'lim, madaniyat, sport va yoshlar masalalari qo'mitasi tashabbusi bilan navbatdagi Hukumat soati tashkil etildi. Yig'ilishda maktab ta'limi sifatini oshirish, inklyuziv muhitni rivojlantirish va pedagoglarni ijtimoiy qo'llab-quvvatlash masalalari atroflicha ko'rib chiqildi. Mazkur yo'nalishdagi ishlar yuzasidan Maktabgacha va maktab ta'limi vaziri E'zoza Karimova deputatlarning savollariga javob qaytardi.

Maktablarda ta'lim sifati va yangi baholash tizimi

Vazir o'z axborotida so'nggi olti yilda mamlakatda 14 ta Prezident maktabi, 9 ta ijod hamda 203 ta ixtisoslashtirilgan maktablar barpo etilganini ta'kidladi. Hozirgi kunda 3 ming 434 ta maktabda yangi baholash tizimi amaliyotga tatbiq etilgan bo'lib, kelgusi o'quv yilidan boshlab bu ko'rsatkichni 4 ming 500 taga yetkazish rejalashtirilgan. Yangi tizim joriy qilingan ta'lim maskanlarida o'quvchilarning o'zlashtirish ko'rsatkichlari 53 foizdan 72 foizgacha o'sgan. Eng yuqori natija ko'rsatgan 275 ta maktabning barcha o'qituvchilariga 40 foizgacha ustama berilmoqda.

Ma'lum qilinishicha, chet tili sertifikatiga ega o'quvchilar soni 40 ming nafardan oshgan. Shuningdek, AQSH, Buyuk Britaniya, Fransiya, Germaniya, Janubiy Koreya va Xitoydan 1 ming 456 nafar xorijiy mutaxassis ta'lim jarayoniga jalb qilingan. Bugungi kunda mamlakatimizda 310 ming nafar pedagog malaka toifasiga ega.

Inklyuziv ta'lim va ijtimoiy yordam choralari

Hukumat soatida inklyuziv ta'limni rivojlantirish masalasiga alohida to'xtalib o'tildi. Hozirda 2 ming 365 ta maktabda inklyuziv sinflar ochilib, ularga 6 mingga yaqin bola qamrab olingan. Shuningdek, 651 ta maktabda to'siqsiz muhit yaratilib, 1 ming 404 ta binoga maxsus panduslar o'rnatildi, 115 ta maktabda brayl alifbosidagi tugmali liftlar ishga tushirildi. Oxirgi besh yilda 7 mingdan ziyod pedagog inklyuziv ta'lim bo'yicha malakasini oshirdi.

Ijtimoiy himoyaga muhtoj oilalar farzandlarini qo'llab-quvvatlash borasida ham qator ishlar amalga oshirilmoqda. Xususan, ijtimoiy reyestrdagi oilalarning 387 ming nafar farzandi maktabgacha ta'limga qamrab olingan. Kambag'al oilalar farzandlarining nodavlat bog'chalar uchun to'lovlarining 40 foizini davlat qoplab bermoqda. Shuning bilan birga, 125 ming nafardan ortiq o'quvchi IT, xorijiy tillar va kasb-hunar to'garaklariga jalb qilinib, ularning xarajatlari 80 foiz miqdorida davlat byudjetidan moliyalashtirilmoqda.

Pedagoglarni rag'batlantirish chora-tadbirlari

O'qituvchilarni qo'llab-quvvatlash va ularni majburiy mehnatga yo'l qo'ymaslik masalalari ham diqqat markazida bo'ldi. 15 yillik staj va oliy malaka toifasiga ega pedagoglar uchun ipoteka kreditlari boshlang'ich to'lovining 25 foizini davlat tomonidan qoplash tartibi joriy etilgan. Yil o'qituvchisi va Kasbiy mahorat yetakchisi tanlovlari g'oliblariga 525 million so'mgacha mukofot puli ajratilishi ham o'qituvchilarni rag'batlantirishda muhim omil bo'lmoqda. Muhokamalar davomida deputatlar ta'lim sifatini yanada yaxshilash, chekka hududlarda kadrlar taqchilligini bartaraf etish yuzasidan o'z taklif va tavsiyalarini bildirdilar.